Isaias 28 - Kalin Apo Dios

Nan Dosan Di Ngawi Ay Mentolay 28:14-22

¹⁴ Dakayo ay mentolay isnan Jerusalem ay mangseselat isnan kalin nan apo, dengngenyo pod nan ibagbagana id wani.

¹⁵ Kanegyo it-it-ek ay nakitolag kayo isnan tetey ya isnan apon di natnatey. Namnamaenyo od ay maid ommat ken dakayo no omdan nan ligat tay nalaing kayo ay menkampot ya men-allilaw ay mangsalin isnan awakyo.

¹⁶ Isonga siya na nan kanan nan apo ay kangatowan. “Ilaenyo, ipegnadko id Sion nan napili ay nabanobanol ay bato ay mang-ipapakneg et nan mangpati ken siya et adi polos madisdismaya.

¹⁷ Nan saadenyo isnan deey ay bato et awnitak ipaila no osto ya tet-ewa nan lokod di lintegna tay awnit matokang nan insaadyo ay kampot ay kaneg nan ikkan di dalalo isnan esek. Et maiyanod nan sinaadyo ay mentabtabonanyo.”

¹⁸ Et awnit mamaid nan nintolaganyo isnan tetey ya isnan apon di natnatey. Dat no domateng nan ligat et maabak kayo ay kaneg kayo nagatigatinan isnan gobat.

¹⁹ Et awnit wakgat ya labi ay domateng nan ligat ay mangpaligat ken dakayo. Et no tonggal waday balo is ipagtek Apo Dios et pomayegpeg kayo is egyatyo.

²⁰ Nan awnityo liknaen et kaneg nan liknan nan mangpadas ay maseyep ngem adi makaseyep tay aptiaptik nan kamana dapay ban-eban-eg nan ewesna et adi omanay.

²¹ Awnit makisape nan apo ay kaneg din nakisapeana isnan bilig di Perazim ya id Gabaon tapno maikkana nan ninemnemna ay ikkan ay olay no kanega kateteken nan ikkana. Awnitna kewasen nan kaskasdaaw ay oblana.

²² Isaldengyo ay mang-am-ammeng isnan ibagbagak ken dakayo tay no men-ammeng kayo et awnit mendagsen nan dosayo. Tay inbagan nan apo ay manakabalin ken sak-en en awnitna dadaelen nan am-in ay ili tako.