Isaias 26 - Kalin Apo Dios

Nan Badang Apo Dios 26:1-8 , 19

¹ Awnit omdan nan agew ay mangkantaan nan ipogaw isnan dagan nan Juda isnan naay ay kanta. “Napigsa nan ili tako tay nan mangbanbantayan Apo Dios nan kaneg mang-ipapakneg isnan bakedna.

² Tokabanyo nan segpan nan ili ta songgep nan nalinteg ay ipogaw ay nan mang-ik-ikkan is osto.

³ Sik-a apo nan mang-idya is tet-ewa ay lamnin isnan mangnenemnem ken sik-a tay mentaltalekda ken sik-a.

⁴ Mentalek kayo ay eng-enggana isnan apo tay kaneg siya nan makneg ay pegnad di nemnem di mangtaltalek ken siya.

⁵ Inpababana nan nangato danapay dadaelen nan napigsa ay ilida ya minekmekna ay kaneg tapok nan bakedda

⁶ daet nan naaamis et gatigatinanda nan namekmek.

⁷ Sik-a apo nan mangpagawis isnan daan nan gawis ay ipogaw ta nan nadadata nan dad-aanenda.

⁸ Tongpalenmi nan kaytem tay maid teken is kaykayatmi ya namnamami nodi sik-a et kedeng.

¹⁹ Nan natnatey ay mamati ken Apo Dios et matagoda kasin. Kasin matago nan aw-awakda ta am-inda ay maseseyep isnan pantiongda et awnitda magido dadat ibogaw nan gasingda. Tay kaneg nan ikkan di odan ay mangsibog isnan esek ta matago nan kaneg nan ikkan nan apo ay mangtago isnan natnatey.”