Isaias 25 - Kalin Apo Dios

Nan Dayaw Ken Apo Dios 25:1-9

¹ Sik-a apo nan Diosko et daydayawek sik-a ya ingatok nan ngadanmo tay kaskasdaaw nan inik-ikkam. Tinongtongpalmo tet-ewa nan deeyday ninemnemmo id kasikasin.

² Dinadaelmo nan dadadakke ay il-ili dakapay bakasen nan makneg ay bakedda ya nan ganaganagwis ay baey di ali ay sinaad nan bosomi et namidda ay adi et kasaad kasin.

³ Nan ipogaw di ninkapipigsa ay ili et awnitda dayawen sik-a. Awnit iyegyat nan il-ilin di makedse sik-a.

⁴ Inmey ken sik-a nan kodokdo ya kaseseg-ang et maid inom-ommat ken daida isdin timpon di golo. Nan badangmo ken daida no maligatanda et kaneg siya nan linongda isnan lemlem ya kanegmo lingban daida isnan domangdang ay poos. Nan makedse ay ipogaw et makisapeda ay kaneg nan napigsa ay lemlem

⁵ ya kaneg nan poos di agew isnan tiyagew. Ngem sik-a apo et pinaginekmo nan mang-ap-apos ken dakami ya pinasaldengmo nan bogaw nan makedse ay ipogaw ay kaneg nan mangpatedekan nan liboo isnan menpoos ay timpo.

⁶ Isnan bilig nan Sion et awnit men-isagana nan apo ay manakabalin is menlagsakan pala isnan am-in ay il-ilin nan batawa ay nan kagagawisan ay sida ya mainom

⁷ danapay kaanen am-in nan kaneg mangpabobolinget isnan nemnemda ay mangpaseseg-ang ken daida.

⁸ Awnit pamaiden nan kangatowan ay apo nan tetey ta adiyet matmatey nan ipogaw et awnitna kaanen nan am-in ay gapo ay men-ag-agaanda. Awnitna kaanen nan kaibabainan di ipogawna. Nan apo ay mismo nan nangwani isna.

⁹ No ommat na dadat kanan en, “Siya nan Dios tako. Nintalek tako ken siya et insalakana met datako. Siya nan apo. Nintalek tako ken siya et id wani pilmi ay men-gasgasing tako tay isalsalakana datako.”