Isaias 2 - Kalin Apo Dios

Nan Talna Ay Maid Kombosna 2:1-5

¹ Siya na nan damag ay inpagtek Apo Dios ken Isaias ay anak Amoz maipanggep isnan probinsya ay Juda ya nan siudad ay Jerusalem.

² Is komasin et nan bilig ay nasaadan nan Templon nan apo et awnit siya nan kangatowan ay bilig isnan am-in ay kabilibilig. Et adoado ay nagapo isnan kailiili nan om-omey isdi.

³ Isnan omay-ayanda dadat kanan isnan iib-ada en, “Akayo ta tomikid tako isnan bilig nan apo ay Dios di Israel ta omey tako isnan Templona. Danat isolo nan kaytena ay ikkan tako ta mendaan tako isnan daan ay pinilina. Tay nan isolsolon nan apo et magapo id Jerusalem ay makwani en Sion tay isdi nan menkaliyana isnan ipogawna.”

⁴ Awnitna banagen nan lilin di dadadake ay il-ili ta men-asitalnada. Isonga dadat pandayen nan ispadada ta estenda is alado ya nan balbegda is kompay. Et adiyet men-gobgobat nan kailiili wenno mensagsagana ay makigobat.

⁵ Dakayo ay an-ak Jacob, akayo ta mendaan tako isnan solsolon nan apo ay kaneg silaw ay idyana ken datako.

Nan Agew Di Kaeegyat 2:10-18

¹⁰ Awnit mentabon nan ipogaw isnan lil-iyang isnan kad-an di batbato ya mensapoda is osok isnan lota tapno itagtaganda koma nan liget nan apo dadapay itabonan nan panakabalin ya kinangatona

¹¹ tay awnit omdan nan agew ay maipababa nan etek ya kinangaton di ipogaw et kedkedeng nan apo is maipangato ya maidaydayaw.

¹² Isnan deey ay agew et ipagowab nan apo ay manakabalin nan men-et-etek ya nan menpapangato ya nan kedeng nan awakda is nenemnemenda.

¹³ Awnitna dadaelen nan ninkangangato ya ganagwis ay kaiw di Lebanon ya nan dadadadake ay kak-aiw di Basan.

¹⁴ Danat dataen am-in nan bilbilig

¹⁵ ya tokangen am-in nan ninkangangato ay baey ya nan tinoping ay kaalaalad.

¹⁶ Awnitna gedan ilin-eb am-in ay bapol ay olay nan kadakelan ya kabegewan.

^17-18 Et awnit mamaid et nan etek ya kinangaton di ipogaw ya mamaid et nan sinangdidios. Isnan omdanan nan deey ay agew et awnit kedkedeng nan apo is maingato ya maidaydayaw.