Isaias 11 - Kalin Apo Dios

Nan Gawis Ay Mentolay 11:1-10

¹ Nan kap-owan David et maiyalig isnan napoyo ay kaiw ngem dat pomngi kasin et bomgas. Siya nan kanegna tay daet wada nan balo ay ali ay kasin magapo isnan ap-on David.

² Wada nan Ispiriton nan apo ken siya ay mang-idya is silib, laing ya kabaelan ay mentolay isnan ipogawna. Getkena nan kayat nan apo danapay patgen siya.

³ Ya awnit men-gasgasing no waday mangtongtongpal isnan apo. Baken nan ilan di ipogaw is menbasbasalana ya adina aped patpatiyen nan aped kalkali.

⁴ Awnit osto nan ikkana ay mangbanag isnan kodokdo danapay badangan daida ay kaseseg-ang. Ngem nan ngawi et madosada ay mapatey gapo isnan bilina.

⁵ Awnit nalinteg ya nadayaw nan ikkana ay mentolay isnan ipogawna.

⁶ Awnit menlamlamnin nan batawa isonga awnit menkakadwa nan atap ay aso ya nan kalnilo ya menkaseyep nan tigre isnan kalding. Maesa nan panganan di anak di kalding isnan anak di layon ya awnit ay-ayowanan di oongong-a daida.

⁷ Men-obong nan baka isnan bear ya awnit menkaseyep nan an-akda. Et awnit sakati nan kanen gedan di layon ay kaneg nan baka.

⁸ Awnit adi maketketban nan onga ay men-ay-ayam isnan sag-en di oweg ay olay no gengen-ana.

⁹ Id Sion ay bilig Apo Dios et maid polos menketeb wenno mendadadael. Et awnit mapno nan batawa isnan getken tako ay maipanggep isnan apo ay kaneg nan mamapnowan di baybay is danom.

¹⁰ Isnan deey ay agew et menbalin ay sinyal nan ali ay kap-owan David isnan kailiili dat madagop nan kaipoipogaw isnan ostoy ilina ay mangdayaw ken siya.