Isaias 1 - Kalin Apo Dios

1:1

¹ Isnan naay ay liblo et ibagana nan inpagpagtek Apo Dios ken Isaias ay anak Amoz maipanggep nan om-ommat id Juda ya id Jerusalem. Naipagtek dana isdin timpo ay nintolayan din da Uzzias, Jotam, Ahaz ya si Hezekias ay aalin di Juda.

Nan Ipabasol Apo Dios Isnan Ipogawna 1:10-20

¹⁰ Dakayo ay mentolay ya dakayo ay mentetee isdi et maiyiso nan ngawi ay ogaliyo isnan iSodoma ya iGomorra id kasin. Isonga dengngenyo nan kankanan nan apo ken dakayo. Masapol ay idngeyo nan isolsolon nan Dios tako ken dakayo.

¹¹ Tay kankanana en, “Ay kananyo en nan adoado ay idatdatonyo ken sak-en nan kaytek? Naomaak et isnan sanada ay kalnilo ay mapop-oowan ay maidatdaton ya nan taban di kagawisan ay talaken. Adiyak et layden nan basan di baka, kalnilo ya kalding.

¹² Ay sino nan nang-ibaga ken dakayo en omal-ali kayo ay aped mangpono isnan Templok?

¹³ Adiyo dat iyali nan sanada ay maid silbina ay datonyo. Naomaak et isnan songsongda. Adyak maanosan nan men-gasgasinganyo isnan binowan ya dinomingo ya nan men-gimgimonganyo ay agin kayo dadayaw ken sak-en gapo isnan basbasolyo.

¹⁴ Kaliligetko nan men-gasgasinganyo ya nan mangnemnemnemanyo isnan napateg ay agew tay mendagsen ken sak-en et nabannogak et ay mang-it-itpe.

¹⁵ No ingatoyo nan ledengyo ay menlowalo et awnitak adi sagsagongen dakayo. Olay no menlol-owalo kayo et adiyak dengdengngen dakayo tay nabasaan nan ledengyo gapo isnan basbasolyo.

¹⁶ Isonga masapol ay dalosanyo nan aw-awakyo isnan ngawi ay ik-ikkanyo tapno maid ngawi is mail-ilak ken dakayo. Dokoganyo nan ngawi

¹⁷ dayot solowen ay mang-ikkan is osto dakayopay makailan ta nan nalinteg nan maik-ikkan dayopay badangan nan maaamis. Ikkanyo nan kalebbenganyo isnan ngoso dayopay salakniban nan balo.”

¹⁸ Kankanan pay nan apo en, “Akayo ta menlilinawag tako. Namansaan kayo is gadangdang gapo isnan basbasolyo ngem owasak dakayo et menbalinek dakayo ay nadalodalos ta pomolaw kayo ay kaneg nan kapes. Olay no pilmi ay men-galaladangdang nan mansayo ngem awnit kayo pomolaw ay kaneg nan kapolaw di kapes.

¹⁹ Basta kitdi tongpalenyo sak-en et awnit gawis nan biyagyo et mangmangan kayo isnan ganagwis ya men-imis ay bongan nan dagayo.

²⁰ Ngem no mangdokog ya mang-adi kayo et mapatey kayo. Sak-en ay apo nan ninkali.”