Habakuk 3 - Kalin Apo Dios

Nan Lowalon Habakuk 3:1-6 , 17-19

¹ Naay nan lowalon nan mamadto ay si Habakuk.

² Kanana en, “apo, dinngek nan inik-ikkam ay naidaydayawam et pilmi nan panangpategko ken sik-a. Ikkam kad kasin id wani nan kaneg san nakaskasdaaw ay inik-ikkam ya managseg-angka koma ay olay no makakaligetka.

³ Omali kasin si Apo Dios ay nagapo id Edom. Owen, omali nan Dios ay maid polos kangawina ay magagapo isnan bilbilig nan Paran. Maila nan kinangatona isnan daya ya getken am-in nan wada isnan batawa nan dayawna.

⁴ Isnan omaliyana et masisilangan isnan kaneg silang di agew. Isnan pat-an di silangna et siya nan naigagagowan nan kabaelana.

⁵ Wada nan dowa ay kaeegyat ay mamakkey ken siya. Ipaon-onana nan sakit ay mangipakalo isnan mang-ap-apos ken siya danat ipaonod nan tetey.

⁶ No isaldengna et menyegyeg nan batawa. Menpayegpeg nan kaipoipogaw no ilaena daida. Nan makneg ay bilbilig et magdayda, nan bilbilig ay nindad-aanana isdin on-onana et makyosda.

¹⁷ Olay no maid begas nan kak-aiw ay makwani en higos ya maid bengan nan obas ya olay no maid maapit is olibo ya maid maapit isnan paypayewan ya olay no matey am-in ay kalnilo ya maid mentetee isnan kolongan di bakbaka

¹⁸ et menlagsakak ya men-gasingak kayet tay nan apo ay Dios nan mangisalsalakan ken sak-en.

¹⁹ Nan kangatowan ay apo nan mang-iyali is pamigsak. Agtana sak-en is laing ay mang-itagtag isnan mang-ap-apos ken sak-en ay kaneg nan ogsa ya mang-ay-ayowan isnan bilbilig ta maid om-ommat ken sak-en.”