Genesis 9 - Kalin Apo Dios

Nan Nakitolagan Apo Dios Ken Noe 9:1-19 , 28 29

¹ Binindisyonan Apo Dios si Noe ya nan an-akna ay mangwani en, “Maganak kayo tasiyay nan ap-oyo et maiwakatda ay mentee isnan batawa.

² Am-in ay matmatago isnan batawa ya nan baybay et iyegyatda dakayo ay ipogaw

³ tay itedko nan kalebbenganyo ay mang-isda ken daida ta maiyanay isnan molmola ay inbagak en menkatagon di ipogaw.

⁴ Ngem masapol ay paayenyo nan am-in ay biyag isonga adiyo is-isda nan egay nakaan nan basana tay nan basa nan kad-an di leng-ag.

^5-6 Am-amed nan biyag di ipogaw is masapol ay paayenyo tay nasapoda ay kanegko isonga no waday menpatey is ipogaw et masapol ay mapatey abes. Nan animal ay menpatey is ipogaw et masapol ay mapatey ya nan ipogaw ay menpatey is ib-ana ay ipogaw et masapol ay mapatey gedan.

⁷ Ngem dakayo et omanak kayo is ad-ado tasiyay wada kasin di mentee isnan batawa.”

⁸ Intoloy Apo Dios ay mangwani ken Noe ya nan an-akna en,

⁹ “Id wani wada nan isapatak ken dakayo ya nan ap-oyo is kasin

¹⁰ ya nan am-in ay matmatago ay nakibala ken dakayo issan bapol.

¹¹ Isapatak ay adi kasin kapkapsong nan batawa ta adi kasin kaeng-engew nan am-in ay matmatago.

¹² Nan kailasinan nan naay insapatak ken dakayo am-in ay matmatago id wani ya is kasin

¹³ et ipaeyko nan batikaang isnan daya.

¹⁴ No menliliboo id daya ya mawada nan batikaang

¹⁵ daket nemnemen nan insapatak ken dakayo ya nan am-in ay matmatago ay adi kasin kapkapsong nan batawa ta adi kasin kaeng-engew nan am-in ay wada isnan batawa.

¹⁶ Owen, no wada nan batikaang id daya et ilaek daket nemnemen nan insapatak isnan am-in ay matmatago isnan batawa.

¹⁷ Isonga no ilaenyo nan batikaang dayot nemnemen ay siya nan kailasinan din insapatak isnan am-in ay matmatago.”

¹⁸ Nan an-ak Noe ay nakkey ken siya isnan bapol et da Sem, Ham ya si Jafet. (Si Ham et aman Canaan)

¹⁹ Nan naayda ay tolo ay an-ak Noe nan kap-owan di am-in ay ipogaw isnan batawa.

²⁸ Issan nakwasan san layos et natatago pay si Noe is tolon gasot ya limampoo ay tew-en

²⁹ et siyam gasot ya limampoo nan tew-ena isdin nateyana.