Genesis 8 - Kalin Apo Dios

Nan Sinmaldengan Nan Layos 8:1-22

¹ Ngem egay kalingkingan Apo Dios da Noe ya nan am-in ay naikawit ken daida isnan bapol isonga inbilina en mendagem dat logyan nan danom ay gomwab

² tay inpasaldengna nan odan ya nan bomalbala ay danom isnan batawa.

³ Naegew dat omat-at-atik nan danom isnan nakwasan san sin-gasot ya limampoo ay agew.

⁴ Issan maikasimpoo ya pito ay agew issan maikapito ay bowan dat pomatong nan bapol isnan bilig ay Ararat.

⁵ Dat omat-at-atik nan danom et issan damo ay agew issan maikasimpoo ay bowan dat maila et nan odon di bilbilig.

⁶ Nallos pay nan epatpoo ay agew dat tokaban Noe nan esay tawan san bapol

⁷ et patayawena nan esay gayang. Dat adi mensagong ay aped mentaytaytayaw engganay natdok nan danom.

⁸ Dat kasin patayawen Noe nan kalapati ta ilaena no inmat-atik nan danom

⁹ ngem gapo tay nalilimon kayet nan lota isnan danom et maid datngan san kalapati is ompaana dat somagong kasin issan bapol dat pasgepen Noe.

¹⁰ Sin-edna is pito ay agew pay danat kasin patayawen san kalapati.

¹¹ Dat somagong issan labi et wada nan tinotopkayana ay tobon di kaiw ay olibo isonga gintek Noe ay inmatiatik nan danom tay tinmobo kasin nan kaiw.

¹² Danat sed-en kasin is pito ay agew danat patayawen kasin. Dat egay ninsagong.

¹³ Issan damo ay agew di damo ay bowan isdin kaenem gasot ya esa ay tew-en Noe, nan natdokan san danom. Dat kaanen Noe nan atep nan bapol et ilaena ay naango et nan lota.

¹⁴ Et issan maikadowampoo ya pito ay agew issan maikadwa ay bowan et namagaan et nan lota.

¹⁵ Dat kanan Apo Dios ken Noe,

¹⁶ “Bomala kayo ay sin-asawa, nan an-akyo ya nan as-awada.

¹⁷ Pabalaenyo gedan daida am-in ay wada isnan bapol tasiyay omad-adoda et maiwakatda isnan batawa.”

¹⁸ Dat bomala da Noe ay sin-asawa, nan an-akda ya nan as-awada.

¹⁹ Am-in san wada isdi ay mendad-aan, menkodkodong ya mentaytayaw et nabob-owegda ay nasin-as-awa ay binmala gedan.

²⁰ Idi binmalada dat men-ala si Noe is bato et itopingna is mangpop-oowana isnan igasingda ken Apo Dios dat omala is tonggal esa isnan am-in ay animal ya koyat ay mabalin ay maisda ya maigasing ken Apo Dios danat paltiyen et poowana enggana ay dinmapo.

²¹ Nan songsong nan mapoowan ay maigasing ken Apo Dios et laylaydena danat kanan isnan nemnemna, “Adiyak kasin eng-engewen nan batawa gapo isnan ik-ikkan nan ipogaw tay getkek ay ngawi ay sigod nan nemnemda. Adiyak gedan eng-engewen nan am-in ay matmatago ay kaneg nan inikkak.

²² Basta mawawada nan batawa et wada nan timpo ay pinag-esek ya pinag-apit. Mawawada gedan nan tedek ya poos, tiyagew ya pinag-odan ya kag-aw ya labi.”