Genesis 7 - Kalin Apo Dios

¹ Nakwas di dat kanan nan apo ken Noe, “Id wani et songgep kayo ay sinbaey isnan bapol ta adi kayo katey tay getkek ay kedkedengka is mang-ik-ikkan is osto isnan batawa.

² Omisgepka is sin-as-awa isnan am-in ay matmatago ay inbagak en adi kaisda ngem sinpipto ay sin-as-awa isnan am-in ay mabalin ay maisda ya nan igasingyo ken sak-en

³ ya nan am-in ay klasin di koyat. Ikkam na tasiyay am-in ay matmatago et adida katey nodi omad-adoda kasin isnan batawa.

⁴ Adi pay isnan pito ay agew daket palayogen nan odan et men-od-od-odan is epatpoo ay agew ya labi tasiyay malimon am-in ay matmatago ay binoliwko.”

⁵ Dat ikkan Noe nan am-in ay inbilin nan apo ken siya.

⁶ Si Noe et enem gasot nan tew-ena isdin napsongan nan batawa.

⁷ Si Noe ya nan asawana, nan an-akna ya nan as-awada et sinonggepda isnan bapol tasiyay adida malimon.

⁸ Nan sin-as-awa isnan am-in ay matmatago

⁹ et nakisgepda gedan ken Noe isnan bapol ay kaneg san inbagan Apo Dios.

¹⁰ Nakwas pay nan pito ay agew dat domateng et nan layos.

Nan Napsongan Nan Batawa 7:11-24

¹¹ Isdin maikasimpoo ya pito ay agew isnan maikadwa ay bowan isdin kaenem gasot nan tew-en Noe et siya san ninlogyan nan layos. Binmala nan danom isnan kabalabalaan dapay beksen nan daya nan odana

¹² et nin-od-od-odan is epatpoo ay agew ya labi.

¹³ Issan deey ay agew et nakasgep et isnan bapol da Noe ay sin-asawa ya nan an-akda ay lalaki ay da Sem, Ham yas Jafet ya nan as-awada.

¹⁴ Nakisgep gedan ken daida nan am-in ay menkodkodong, mendad-aan ya mentaytayaw ay amo ya atap, dadake ya teteen.

¹⁵ Nasin-as-awada am-in ay matmatago ay nakisgep ken Noe isnan bapol

¹⁶ ay kaneg san inbagan Apo Dios. Dat emban nan apo nan bapol.

^17-19 Dat men-od-od-odan is epatpoo ay agew. Dat omad-adaem nan danom et mendaan san bapol. Inmadaadaem et linas-okana nan kaaatakdagan ay bilbilig

²⁰ dat kayet ngomatngatngato nan danom engganay limay depa nan nanglas-okana isnan bilbilig

²¹ et nalimon am-in ay wada isnan batawa et nateyda.

²² Owen, am-in ay men-ang-anges et nateyda

²³ tay naengew am-in ay matatago ay ipogaw, animal ya koykoyat et kedeng si Noe ya nan nakisgep ken siya isnan bapol is nabay-an.

²⁴ Nan danom et egay nakeskesayan engganay nakwas nan sin-gasot ya limampoo ay agew.