Genesis 6 - Kalin Apo Dios

Si Noe 6:5—7:10

⁵ Idi inilan nan apo ay nginmawi am-in nan ik-ikkan nan ipogaw isnan batawa ya ngawi et kedeng nan nenemnemenda

⁶ dat ninbabawi isnan nangsapowana ken daida. Dadama nan sakit di nemnemna

⁷ isonga danat kanan, “Awnitak engewen am-in nan ipogaw ay binoliwko, nan animalis ya nan koykoyat gedan tay menbabawiyak ay nangboliw ken daida.”

⁸ Ngem wada nan esay ipogaw ay laylayden nan apo et siya si Noe.

⁹ Gawis nan ogalina et kedkedeng siya is gawis ay ipogaw issan timpona tay tongtongpalena si Apo Dios.

¹⁰ Tolo nan an-ak Noe ay lalalaki ay da Sem, Ham ya si Jafet.

^11-12 Ngem am-in ay ipogaw isnan kailiili et ngawida isnan pangiilaan Apo Dios tay ngawi am-in nan ogalida et maiwed olay esa is gawis di ik-ikkana nodi kedeng si Noe.

¹³ Isonga kinwanin Apo Dios ken siya, “Ninemnemko ay engewek am-in ay ipogaw isnan batawa. Owen, engewek am-in ay wada tay napno nan batawa isnan ngawi ay ik-ikkanda.

¹⁴ Ngem sik-a Noe et mensapoka is dakedake ay bapol ay kaiw ay kaneg kahon tasiyay adi kayo malimon ay sinbaey. Nan bapol ay awnitmo sapowen et masapol ay pakpakam is niket nan leemna ya nan deyana tasiyay adi makasgep nan danom.

¹⁵ Nan lokodna et siyampoo ay depa nan kaan-andona, simpoo ya limay depa nan kaan-annawana ya siyam ay depa nan kaat-atakdagna.

¹⁶ Mensapoka is atepna ngem taynam nan doway dangan is menbaetan nan atepna ya nan awakna. Sapowem is tolo ay galado dakat kok-owaltowen dakat isapowan is segpana.

¹⁷ Masapol ay mensapoka is bapol tay awnitak posongen nan batawa ta malimon am-in ay matatago. Matey am-in ay wada isnan batawa

¹⁸ ngem isapatak ken sik-a en isalakanko dakayo. Isonga awnit kayo songgep isnan bapol, dakayo ay sin-asawa, nan an-akmo ya nan as-awada.

¹⁹ Omisgepka is sin-as-awa isnan am-in ay matmatago tasiyay adida matey.

²⁰ Tay awnit omey ken sik-a nan sagdodwa isnan am-in ay menkiwkiwi isnan batawa ay nan mendaan, nan mentayaw ya nan menkodong ta adida matey.

²¹ Omisgepka gedan is am-in ay makan ay masapolyo.”

²² Dat tongpalen Noe nan am-in ay inbilin Apo Dios.