Genesis 42 - Kalin Apo Dios

Nan Inmayan Nan Bebsat Jose Id Egipto 42:1-8 ; 45:3-11 , 21-28

¹ Id Canaan ay ilin da Jacob et ninbitil gedan et idi gintek Jacob ay wada nan pagey id Egipto danat kanan isnan an-akna ay lalalaki, “Dakayon aped menkikiyat?

² Dinngek ay wada kano nan pagey id Egipto. Omey kayo bawet isdi ta enkayo lomako is kanen tako ta adi tako katey.”

³ Isonga dat omey san simpoo ay bebsat Jose

⁴ ngem egay inpalobos Jacob ay makkey si Benjamin ay naisned ken Jose tay omegyat modatya waday ngawi abes is ommat ken siya.

⁵ Kaipoipogaw nan naibowegan san an-ak Jacob ay omey lomako is pagey id Egipto.

⁶ Si Jose nan gobilnadol isdi isonga siya nan mangilaklako isnan pagey. Isonga san bebsatna ay inmey isdi et ninlokbobda ay mangdayaw ken siya.

⁷ Inmatonan Jose daida ngem egayna inpapadlaw ay getkena daida. Danat ibibiyad ay mangwani, “Into nan nagapowanyo?” Dadat kanan, “Apo, nagapo kami id Canaan et inmali kami ay lomako koma is pagey.”

⁸ Si Jose et getkena ay daida nan bebsatna ngem daida et egayda naimatonan siya. Nin-ilako si Jose ken daida is pagey dadat somaa. Idi mabaybayag dadat kasin omey ay lomako is pagey ngem ado on-ona nan inommat esapay menpagtek si Jose ken daida ay siya nan besatda.