Genesis 41 - Kalin Apo Dios

Nan Iitaw Di Ali 41:1-57

¹ Nakwas nan doway tew-en dat isnan esay labi et iitawen san ali id Egipto en tomatakdeg siya isnan benget di ginawang ay Nile

² dat madanaka isnan danom nan pito ay baka ay menlalmes et men-atibda is logam.

³ Dat madanaka kano abes nan pito ay baka ay menkakakao et maiila nan tadlangda. Dadat omey isnan sag-en san menlalmes ay baka

⁴ et apedda isda san menlalmes. Dat magido nan ali.

⁵ Naseyep dat kasin men-iitaw et inilana kano nan pito ay nanaptong ay baga isnan esay bilog ay pagey

⁶ dat mawanada nan pito ay kolaw ay baga issan deey gedan ay bilog di pagey

⁷ dat aped kanen nan kolaw san nanaptong. Dat magido nan ali et getkena ay nin-iitaw kasin.

⁸ Issan kawakgatana et dadama ay masasangot no ngan nan kayat ay kanan nan iitawna isonga danat paayagan am-in ay mamasilib is panggep di iitaw ya tap-in di kinasilib id Egipto. Inbagana ken daida nan iitawna ngem maiwed makaibaga isnan kayat ay kanan nan iitawna.

⁹ Dat kanan san mangid-idya is inomen san ali, “Id wani ninemnemko et nan basolko.

¹⁰ Isdin nakaligetam ken sak-en ya din ib-ak ay men-ot-oto is tinapay et inbalodmo dakami isnan baey di kapitan di gowaldiya.

¹¹ Dat isnan esay labi et nin-iitaw kami ay dowa ay teken nan banagda

¹² dakamit ibaga isnan esay Hebreo ay naibabalod gedan isdi ay baan nan kapitan di gowaldiya. Danat ibaga nan kayat ay kanan din iitawmi

¹³ et tinmet-ewa din inbagana tay inpasagongmo sak-en isnan sigod ay oblak dakapay inpapoto din men-ot-oto is tinapay.”

¹⁴ Pinaayagan ay dagos nan ali si Jose isnan pagbalodan. Pinokisanda dat mensokat et omey issan kad-an di ali.

¹⁵ Kinwanin san ali ken siya, “Wada nan iitawko et maiwed makaibaga isnan kanana ngem dinngek ay makaibagaka isnan kanan nan iitaw isonga inpaayagko sik-a.”

¹⁶ Dat kanan Jose, “Apo, maid kabaelak ay mangibaga nodi si Apo Dios nan mangipagtek isnan kanan nan iitaw.”

¹⁷ Dat kanan san ali, “Siya na nan iniitawko. Tinmatakdegak kano isnan benget nan ginawang ay Nile

¹⁸ dat madanaka isnan danom nan pito ay baka ay menlalmes et men-atibda is logam.

¹⁹ Dat madanaka abes nan pito ay baka ay menkakakao et maiila nan tadlangda. Maiwed inil-ilak is kaneg todi id isna Egipto.

²⁰ Dat aped isdan nan menkakakao ay baka san menlalmes

²¹ ngem adi kadlaw ay inisdada dadi tay nakaokaoda kayet. Daket magido.

²² Iniitawko gedan en inilak nan pito ay baga ay nanaptong isnan esay bilog ay pagey

²³ dat mawanada abes nan pito ay kolaw ay baga issan deey met laeng ay bilog di pagey.

²⁴ Dat aped kanen san pito ay kolaw san nanaptong. Inbagak nan iitawko isnan mamasilib isna ngem maiwed makaibaga no ngan nan kayat ay kanan nan naay iitawko.”

²⁵ Dat kanan Jose, “San dowa ay iitawmo et men-iiso nan kananda. Inpagtek Apo Dios ken sik-a nan awnit ommat isna.

²⁶ San pito ay menlalmes ay baka ya san pito ay nanaptong ay baga et pito ay gawis ay tew-en nan kayatda ay kanan.

²⁷ San pito ay menkakakao ay baka ya san pito ay kolaw ay baga et pito ay tew-en ay bitil nan kayatda ay kanan.

²⁸ Siya na nan inpagtek Apo Dios ay awnit ommat.

²⁹ Awnit wada nan pito ay tew-en ay gawis nan apit, talaken ya am-in ay wada id isna Egipto.

³⁰ Ngem no makwas di dat menbitil is pito ay tew-en et am-in san gawis ay tew-en et awnit makalingkingan

³¹ tay maamin am-in ay menkatagon di ipogaw gapo tay awnit dadama nan bitil.

³² Nan gapo ay namindowa ay iniitawmo et ta ipailana ay tet-ewa ay ommat nan inbagak ken sik-a tay siya nan inbagan Apo Dios et naay nganngani ay ommat.

³³ Isonga masapol ay piliyem nan kasiliban ay ipogaw ta siya nan kigad isnan naay ay ili.

³⁴ Masapol gedan ay mendotokka is tap-in di ipogaw

³⁵ ta ponponokenda nan pagkaliman nan am-in ay maap-apit isnan pito ay gawis ay tew-en ta idolinda isnan agamang isnan il-ili.

³⁶ Dadat banbantayan ay pala ken sik-a, Apo, tasiyay waday omanay is kanen di ipogaw no omdan nan pito ay tew-en ay bitil tasiyay adi katey nan ipogaw is owatda.” Siya di nan kinwanin Jose.

³⁷ San ali ya san oopisyalna et laydenda san inbagan Jose

³⁸ dat kanan san ali ken daida, “Maiwed teken is kasiliban nodi si Jose tay wada si Apo Dios ken siya.”

³⁹ Isonga kinwanin san ali ken Jose, “Gapo tay inpagtek Apo Dios ken sik-a nan kanan nan iitawko et maid teken is kasiliban nodi sik-a.

⁴⁰ Dotokak sik-a ay men-apo isnan ilik et am-in nan ipogawko et tongpalenda nan ibilbilinmo. Sik-a nan maisned ken sak-en ay kangatowan.”

^41-42 Dat kaanen nan ali nan galmatna et ipasingsingna ken Jose danapay badowan siya is gawigawis danapay owayan is balitok. Danat kanan, “Ilam, idyak nan kalebbengam ay men-apo isnan am-in ay sakop nan Egipto.”

⁴³ Inidyana gedan nan maikadwa ay kagawisan ay pagloganana ken Jose et olay intoy omay-ayana et wada nan mangon-on-ona ay mangmangwani en, “Menkiwang kayo.”

⁴⁴ Dat kanan san ali ken Jose, “Olay no sak-en nan ali ngem sik-a nan masapol ay mangibagbaga isnan am-in ay ik-ikkan di ipogaw id isna ay Egipto.”

^45-46 Danat ngadnan si Jose is Zafenat Panea ay ngadan di Egipto. Inpaasawana gedan siya ken Asenat ay anak Potifera ay padi isnan ili ay Heliopolis ay sakop di Egipto. Si Jose et tolompoo nan tew-ena isdin nangilogyana ay mensilbi isnan alin di Egipto. Komak-aan siya issan baey di ali et om-omey isnan am-in ay il-ili id Egipto.

⁴⁷ Issan pito ay tew-en et gawis tet-ewa nan apit.

⁴⁸ Dat ipaponponok Jose nan pagkaliman di naap-apit isnan il-ili dadapay idoldolin.

⁴⁹ Pilmi ay adoado nan naap-apit ay indoldolinda ay kaneg nan kaad-adon di lagan isnan baybay et gapo isnan kaadona et insaldengda ay mang-ilislista.

⁵⁰ Esapay omdan nan bitil et dowa ay lalalaki nan anak da Jose ken Asenat.

⁵¹ Et gapo isnan iyon-a ay anakna et kinwanin Jose, “Binadangan Apo Dios sak-en ay nangkalingking isnan am-in ay ligatko ya nan seg-angko isnan pamilyan ama.” Isonga Manases nan inpangadana.

⁵² Idi inmanakda kasin danat kanan en, “Inagtan Apo Dios sak-en is anak isnan ili ay napalpaligatak.” Isonga Efraim nan inpangadana isnan maikadwa ay anakna.

⁵³ Nakwas san pito ay tew-en ay gawis nan apit id Egipto

⁵⁴ dat menlogi nan bitil ay pito ay tew-en ay kaneg san inbagan Jose. Isnan il-ili ay nangliliwes id Egipto et ninbitil gedan ngem id Egipto et adoado nan pagey isnan pagdoldolinan.

⁵⁵ Idi maid kanen nan iyEgipto dadat omey men-ated isnan ali isonga inbilina en omeyda ken Jose ya ikkanda nan ibagan Jose ken daida.

⁵⁶ Dat omam-amed nan bitil isnan kailiili isonga tinokaban Jose am-in nan naidoldolinan nan pagey et ilakona isnan iyEgipto.

⁵⁷ Dat pay isnan kaipoipogaw ay magapo isnan nateketeken ay ili et omeyda gedan lomako is pagey ken siya id Egipto.