Genesis 40 - Kalin Apo Dios

Nan Nangibaggan Jose Isnan Kanan Nan Iitaw Di Iib-ana 40:1-23

^1-2 Isnan namingsan nakaliget nan ali isnan doway baana ay nan esa et men-ot-oto is tinapay ya nan esa et siya nan mangid-idya is inomena

³ danat ipabalod daida isnan baey di kapitan di gowaldiya ay naibabalodan gedan Jose.

⁴ Dat ibagan nan kapitan en si Jose nan menbaan nan doway baan san ali. Nabayagda isnan pagbalodan

⁵ dat isnan esay labi et nin-iitawda ay dowa.

⁶ Idi nawakgat dat ilaen Jose ay mensasadotda

⁷ danat sooten, “Ay tay dakayon mensasadot id wani?”

⁸ Dadat kanan, “Owen tay wada nan iitawmi ngem maiwed polos makaibaga isna isnan kayatda ay kanan.” Dat kanan Jose, “Si Apo Dios et kedeng nan mangidya isnan kabaelan nan ipogaw ay mangibaga isnan kayat ay kanan nan iitaw. Kadya, ibagayo nan iitawyo.”

⁹ Isonga dat kanan san mangid-idya is inomen di ali, “Nan iniitawko et wada kano nan obas isnan sasagangek

¹⁰ ay tolo nan pingina dat mawanada nan bengana dat mabanoliw is begasna daet maom ay dagos.

¹¹ Ginegen-ak kano nan tasan nan ali isonga daket alaen nan naom ay obas et pespesak nan danomna isnan tasa daket idya ken siya.”

¹² Dat kanan Jose, “Siya na nan kayatna ay kanan. San tolo ay pingi et tolo ay agew.

¹³ Adi pay isnan tolo ay agew et awnit pabalaen nan ali sik-a, pakawanena sik-a danapay pasagongen sik-a issan sigod ay oblam et awnit id-idyam kasin nan in-inomena ay kaneg din sigod ay ik-ikkam.

¹⁴ Ngem pangaasim ta esaka mangnemnemnem no mensagongka isnan ali ay men-obla. Pangaasim ta esam ibaga isnan ali ta badangana sak-en ay bomala isnan pagbalodan ay naay

¹⁵ tay naakewak isnan ilik ay Canaan dat naay apedak naibabalod dapay maid inikkak is kaibalodak.”

¹⁶ Idi dinngen san men-ot-oto is tinapay ay gawis nan inbagan Jose maipanggep isnan iitaw san ib-ana danat kanan, “Siya na abes nan iitawko. Inaagtok kano nan tolo ay bitoto ay tinapay.

¹⁷ Isnan nin-ooson ay bitoto et wada am-in nan nateketeken ay tinapay ay pala isnan ali ngem dat aped omali nan koyat et kanenda.”

¹⁸ Tinban Jose, “Siya na nan kayatna ay kanan. San tolo ay bitoto et tolo ay agew.

¹⁹ Adi pay isnan tolo ay agew et pabalaen nan ali sik-a danat ipapoto sik-a. Danat isakkey nan awakmo isnan kaiw et awnit omey nan koyat ay mangtopkay isnan begasmo.”

²⁰ Nakwas nan toloy agew et siya di san agew ay kanemneman san naiyanakan nan ali isonga danat paayagan nan oopisyalisna ta menlalagsakda. Danat pabalaen san doway naibalod ay baana

²¹ et pasagongena san mangid-idya is inomena issan sigod ay oblana

²² danapay inpapoto san men-ot-oto is tinapay ay kaneg san inbagan Jose.

²³ Ngem san egay inpapoton san ali et egayna tinongpal san inbagan Jose tay kinalingkingana siya.