Genesis 39 - Kalin Apo Dios

Si Jose Id Egipto 39:1-23

¹ San nanglako ken Jose et inlakoda siya id Egipto ken Potifar ay esay apon di sosoldadon di ali.

² Si Jose et isnan baey nan apona ay si Potifar nan menteteana et tatakdowen nan apo siya isonga gawis am-in nan ik-ikkana.

³ Idi inilan san apona ay badbadangan nan apo siya

⁴ dat men-gasing danat piliyen siya isnan am-in ay babaana et siya nan mangbanbantay isnan baeyna ya am-in ay kokwana.

⁵ Menlogi isdi et pinagawis nan apo nan pamilyan Potifar ya nan mentetee isnan baeyna ya nan am-in ay kokwana isnan baeyna ya isnan dagana gapo ken Jose.

⁶ Isonga dat idyan Potifar ken Jose nan kalebbengana ay mang-ayowan isnan am-in ay kokwana et maiwed pay nemnemnemen Potifar is teken nodi kedeng nan mangpiliyana is kayatna ay kanen. Si Jose et makneg ya gowapo

⁷ isonga naawis si asawan Potifar ken siya. Isnan esay agew et inbagana en makiseyep si Jose ken siya

⁸ ngem inadiyan Jose danapay kanan, “Ilam et maiwed kasasangotan asawam ay apok isnan am-in ay wada isnan baeyyo tay wadaak ay talkena ay mang-ayowan isnan am-in ay kokwana

⁹ et intalekna nan am-in ken sak-en nodi kedengka is egayna intalek tay asawana od sik-a. Daken aped ikkan di ngawi ta bomasolak ken Apo Dios?”

¹⁰ Et olay no inagew ay ibagbagana ken Jose ay makiseyep ken siya ngem adyana.

¹¹ Ngem isnan esay agew ay ik-ikkan Jose nan oblana et maiwed ipogaw isdi nodi kedengda ken asawan Potifar

¹² danat goyoden nan badon Jose ay mangwani, “Aka bawet ta maseyepta.” Ngem dat menkaan Jose san badona ay gogoyoden asawan Potifar tasiyay makalayaw.

¹³ Idi inilan san babai ay tinaynan Jose nan badona

¹⁴ dat aped men-oowakis dat omey nan babaana danat kanan, “Ilanyo pod! Nan Hebreo ay inyalin asawak isna et pababainena datako! Inmali et kanana en mangloko

¹⁵ ngem nin-owakisak dat tomagtag et taynana nan badona ay naay isnan kad-ak!”

¹⁶ Indolina san badon Jose engganay sinmaa san asawana

¹⁷ danat ibaga san kaneg san inbagana issan babaana ay mangwani, “San Hebreo ay inyalim isna ay baa et kanana en mangloko

¹⁸ ngem idi nin-owakisak dat tomagtag et taynana nan badona ay naay isnan kad-ak!”

¹⁹ Idi dinngen san apon Jose di dat makaliget

²⁰ danat ipabalod si Jose isnan pagbalodan ay kad-an nan balod di ali.

²¹ Ngem nan apo et tatakdowena kayet si Jose isonga laylayden nan mangbanbantay isnan balod siya.

²² Danat ipasoblat nan oblana ken Jose et siya nan kigad isnan iib-ana ay babalod ya isnan am-in ay maik-ikkan isnan pagbalodan.

²³ Et maiwed et madadanagan san mangbanbantay tay gawis am-in nan ik-ikkan Jose tay badbadangan nan apo siya.