Genesis 37 - Kalin Apo Dios

Si Jose 37:2-35

² Siya na nan istolyan nan pamilyan Jacob. Idi simpoo ya pito nan tew-en Jose ay anakna dat maikawkawit isnan bebsatna ay an-ak da Bilha ken Zilpa et banbantayanda nan kalnilo ya kaldingda. Ngem ibagbagan Jose ken amana nan ngawi ay ik-ikkan nan bebsatna.

³ Si Jose nan laylayden Jacob isnan am-in ay an-akna tay sokod naam-ama siya sapay maiyanak isonga inagtana is gawigawis ay bado ay an-ando nan payakna.

⁴ Idi inilan nan bebsatna ay laylayden amada si Jose mo daida dadat mamaslat ken siya et ngawi nan ikkanda ay menkali ken siya.

⁵ Isnan namingsan wada nan iitaw Jose et idi inbagana isnan bebsatna dadat am-amed mamaslat ken siya.

⁶ Siya na nan kinwanina, “Dengngenyo pod nan iniitawko.

⁷ Wada tako kano am-in isnan payew ay menbedbedbed is pagey dat matood nan binedbedko dat likoben nan binedbedyo et menyodongda ken siya.”

⁸ Dadat mamaslat ay mangwani, “Ay kanam en esakami men-apo sik-a?” Isonga am-amedda kaseselat siya gapo isnan iitawna ya nan kinwanina maipanggep isnan iitawna.

⁹ Dat wada kasin nan iitaw Jose. Danat ibaga isnan bebsatna, “Wada nan iitawko kasin ay inilak kano nan agew, bowan, ya nan simpoo ya esa ay talaw ay ninpalintomeng ken sak-en.”

¹⁰ Inbagana gedan ken amana nan iitawna dat islat amana ay mangwani, “Ngan di kaneg tosa is iitaw? Ay kanam en si inam, sak-en ya nan bebsatmo et esakami menpalintomeng ken sik-a?”

¹¹ Nan bebsat Jose et mamaslatda ken siya ngem si amana et nemnemnemena no ngan nan kayat ay kanan nan iitawna.

¹² Isnan esay agew ay wada nan bebsat Jose id Sikem ay mangipaspastol isnan kalniloda

^13-14 dat kanan amada ken Jose, “Kadya, omeyka id Sikem ay menpaspastolan nan bebsatmo isnan kalnilo ta ilaem no gawisda dakat somagong ta ibagam.” Dat kanan Jose en laydena isonga dat palobwaten amana siya isnan ilida ay Hebron et omey id Sikem. Idi inomdan si Jose id Sikem

¹⁵ dat aped menliwliwes isnan papastolan. Dat ilaen nan esay lalaki siya danat sooten, “Ay sino nan an-anapem?”

¹⁶ Dat kanan Jose, “An-anapek nan bebsatko ay mangipaspastol isnan kalnilo isna. Ay waday inil-ilam ken daida?”

¹⁷ Dat kanan nan lalaki, “Kinmaanda isna. Dinngek ay kinwanida en omeyda id Dotan.” Isonga dat onoden Jose daida id Dotan.

¹⁸ Ngem idi inilada siya ay om-omey isnan kad-anda dadat mentotolag en pateyenda siya.

¹⁹ Nin-asikwanida, “Naay omali nan mangibagbaga is iitawna.

²⁰ Pateyen tako datakot ibkas isnan bobon ay maid danom. Datakot kanan ken ama en pinatey di atap ay animal ta ilan tako kad no ngan nan menbalinan nan iitawna.”

²¹ Ngem si Ruben ay iyon-ada et adina layden ay matey si Jose isonga kinwanina, “Adi tako patpateyen siya

²² nodi basta ibkas tako isnan bobon ay maid danom isnan pondag et awnit kigad ay matey.” Kinwanina di tay kanana en esana omey padakaen ta pasagongena ken amada.

²³ Idi inomdan si Jose isnan kad-anda dadat kaanen nan badona ay gawigawis ay an-ando nan payakna

²⁴ et omeyda ibkas isnan bobon ay maid danom. Dat komaan si Ruben dapay itokdon nan bebsatna et manganda.

²⁵ Idi mangmanganda dadat ilaen nan mabob-oweg ay ap-on Ismael. Nan kamelioda et nin-aawitda is ag-agas ay linakowanda id Gilead ay omeyda ilako id Egipto.

²⁶ Dat kanan Juda isnan bebsatna, “Ay ngan di alaen tako no aped tako pateyen nan besat tako datakot kanan en waday nangpatey?

²⁷ Ilako tako bawet isnan naayda ay ap-on Ismael et adi masapol ay pateyen tako. Tay olay no pateyen tako et besat tako kayet siya.” Inyoog nan bebsatna

²⁸ et idi lomaos san aap-on Ismael ay menlaklako ya men-ilako dat padakaen nan bebsat Jose siya isnan bobon et ilakoda siya is dowampoo ay pilak. San nanglako et inyeyda si Jose id Egipto.

²⁹ Si Ruben ay maiwed issan linmaosan san nanglako ken Jose et sinmagong issan bobon ay mang-ayag koma ken Jose dat maiwed obpay si Jose isdi. Danat singaten nan badona gapo isnan seg-angna.

³⁰ Dat omey issan bebsatna et kanana, “Maiwed si Jose isdi! Ay ngan ngen nan ikkak?”

³¹ Ngem dat pomatey san bebsatna is kalding et ippeyda nan basana issan badon Jose.

³² Dadat eyey ken amada san bado et kananda, “Dinatnganmi na isnan pagpastolan. Ay badon Jose na?”

³³ Naimatonan amada ay dagos danat kanan, “Owen, siya sa san badona! Ay apo, pinatey di atap ay animal nan anakko ay si Jose et waay inisdada!”

³⁴ Danat singaten nan badona gapo isnan seg-angna. Dat menbado is sako ta ilemetna tay siya di nan ogalida. Nabayag ay menseseseg-ang gapo isnan anakna.

³⁵ Am-in nan an-akna ay lalalaki ya bababai et liwliwaliwenda siya ngem adi kayet kaliwaliw. Danat kanan, “Ilemetko nan anakko engganay mateyak.”