Genesis 32 - Kalin Apo Dios

Nan Sinmagongan Da Jacob Id Canaan 32:1-12 , 22-31

¹ Idi mendad-aan da Jacob dat omey sab-aten nan tap-in di aanghel siya.

² Idi inilana daida danat kanan, “Mentetee si Apo Dios isna,” isonga danat ngadnan di is Mahanaim.

³ Wadada nan inbaan Jacob ay omon-ona ay mangipagtek ken siya ken Esau ay besatna id Edom.

⁴ Danat ibaga ken daida en, “Kananyo ken Esau en naay nan kanan Jacob ken sik-a. Si Jacob ay baam kano et ibagana ken sik-a, Esau ay apona, ay nakitetee siya ken Laban enggana id wani isonga egay kano sinmagong id issa.

⁵ Iyalina kano nan ado ay baka, kalding, kalnilo, kabayo ya baa et inpaibagana na ken sik-a, Apo, ta gomasingka kano.”

⁶ Idi sinmagong san deeyda ay binaan Jacob dadat kanan, “Inmey kami ken Esau ay besatmo et omal-ali et siya ay mangsab-at ken sik-a. Inpapakeyna nan epatpoo ay gasot ay lalalaki.”

⁷ Inmegyat si Jacob danat gedwaen is dowa ay bonggoy nan ipogawna ya nan kalnilo, kalding, baka, ya nan kamelio

⁸ tay kanana en no labanen Esau nan gedwa ay bonggoy et mabalin ay tomagtag nan kagedwa.

⁹ Nakwas pay di dat menlowalo si Jacob ay mangwani en, “Apo Dios ay Dios din alapok ay si Abraham ya Dios amak ay Isaac, inbagam en awnitmo pasagongen sak-en isnan ilik ya isnan ag-ik et gawis nan ikkam ken sak-en.

¹⁰ Ngem adiyak kapaay dakapay kayet ik-ikkan nan gawis ken sak-en ay baam. Isdin nanggedangak isnan ginawang ay Jordan ay kinmaanak isnan ilik et maid ginegen-ak nodi kedeng nan sokodko ngem id wani pay et naay somagongak ay wada nan naay dowa ay bonggoy.

¹¹ apo, dawatek ay salaknibam sak-en isnan besatko ay si Esau tay omegyatak modatya omal-ali ay mangpatey ken sak-en, isnan an-akko ya nan in-ada.

¹² Tay insapatam ken sak-en en gawis nan ikkam ken sak-en ya awnitmo paadoadowen nan ap-ok ay kaneg nan kaad-adon nan lagan isnan benget di baybay ay maid makabilang.” Inmapa da Jacob issan kad-anda issan labi et idi nawakgat dat menpili isnan nateketeken ay talakena is nasolok ay liman gasot danat ibaa nan babaana et iyeyda isnan besatna ay si Esau.

²² Issan deey pay ay labi et binmangon si Jacob danat gidowen nan dowa ay asawana, nan dowa ay baana ay bababai ya nan simpoo et esa ay an-akna danat ipagdang daida issan ginawang ay Jabbok.

²³ Nakwas pay ay inpagdangna daida danat abes ipagdang nan am-in ay kokwana

²⁴ dapay mataynan ay es-esa. Dat domateng nan esay am-ama et mendamada enggana ay pomat-a.

²⁵ Idi ilaen san am-ama ay adi makaabak ken Jacob danat mensogto nan leplepyak Jacob et maikobsil nan ninsoopan di tolangna.

²⁶ Dat kanan san am-ama ken siya, “Palobosam sak-en tay naay pomat-a.” Dat kanan Jacob, “Adiyak enggana ay mangbindisyonka on-ona.”

²⁷ Dat sooten san am-ama, “Ay ngan nan ngadanmo?” “Jacob,” insongbatna.

²⁸ Dat kanan san am-ama, “Menlogi id wani et baken et Jacob nan ngadanmo tay nakidamaka ken Apo Dios ya isnan ipogaw et nangabakka isonga Israel et nan menngadanmo.”

²⁹ Dat kanan Jacob, “Dawatek ta ibagam nan ngadanmo.” Ngem danat kanan, “Ayta dakan kayten ay manggetek isnan ngadanko?” Danat bindisyonan si Jacob dat komaan.

³⁰ Dat kanan Jacob, “Inilak nan angas Apo Dios dakpay daan kayet ay natatago.” Danat ngadnan san deey ay logal is Peniel.

³¹ Binmala nan agew issan kinmaanan Jacob id Peniel et menpilpilay gapo isnan inommat isnan opona. Ginomdang si Jacob issan kad-an san as-awana. Et olay no omeegyat si Jacob ay daan nan liget Esau ken siya ngem adi obpay tay dat omey si Esau ya nan adoado ay iib-ana ay mangsab-at ken daida et men-galalasingda ay sin-agi ay men-inila. Nabayag pay dat komaan si Esau et omey mentee id Edom.