Genesis 3 - Kalin Apo Dios

Nan Login Di Sinmokilan Di Ipogaw 3:1-24

¹ Nan oweg nan kasikapan isnan atap ay animalis ay binoliw nan apo ay Dios. Isnan esay agew sinoot nan oweg isnan babai, “Ay tet-ewa ay inbagan Apo Dios en adiyo kankanen nan begas nan kak-aiw isnan galdin?”

² Dat kanan san babai, “Egay. Mabalin kano ay kanenmi nan begas di kak-aiw isnan galdin malaksig nan esay kaiw isnan tengana.

³ Inbagan Apo Dios en adimi kankanen wenno gen-gen-an nan begas nan deey ay kaiw tay no ikkanmi et matey kami.”

⁴ Dat kanan san oweg, “Baken kadi tet-ewa ay matey kayo.

⁵ Aped kinwanin Apo Dios di tay getkena ay no kanenyo di et komaneg kayo ken siya ay mangtek is gawis ya ngawi.”

⁶ Inilan san babai ay gawigawis san deey ay kaiw ya gawigawis gedan nan begasna is makan danat nemnemen ay kagagasing nan menbalin is masilib isonga dat pomoting et kanena danat agtan si asawana danat abes kanen.

⁷ Idi kinanda di dadat manalikna ay ninlalabosda dadaet menbinain isonga dadat mendait is tobon di kaiw et igatengda.

⁸ Issan nalabiyana dadat dengngen ay mendad-aan nan apo ay Dios isnan galdin. Dadat men-gago isnan kak-aiw

⁹ ngem dat bogawan nan apo ay Dios san lalaki ay mangwani, “Intoka?”

¹⁰ Danat kanan, “Dinngek ay wadaka isnan galdin isonga inmegyatak daket men-gago tay ninlalabosak.”

¹¹ “Sino nan nangibaga en ninlalaboska? Ay kinanmo san begas di kaiw ay inbagak en adim kankanen?” sinoot Apo Dios.

¹² Dat kanan san lalaki, “Nan babai ay inyalim ken sak-en nan nangyali isnan begasna daket kanen.”

¹³ Dat sooten nan Apo ay Dios issan babai, “Ay tay dakan inikkan di?” Danat kanan, “Nan oweg nan nangbali ken sak-en en kanek di.”

¹⁴ Dat kanan nan apo ay Dios issan oweg, “Madosaka gapo isnan inikkam et kedengka isnan am-in ay matmatago nan maikkanan nan naay. Menlogi id wani et menbob-ooska isnan lota engganay mateyka.

¹⁵ Menbosowek dakayo isnan babai et nan ap-ona ya nan ap-om et awnit menbibinosoda gedan. Tegtegen di ipogaw nan toktokmo dakapay abes bangten nan mokodna.”

¹⁶ Danat kanan isnan babai, “Paad-adowek nan ligatmo isnan kalilitonam ya nan sakit isnan omanakam. Ngem olay no siya di et laylaydem kayet nan asawam ya siya nan apom.”

¹⁷ Danat kanan isnan lalaki, “Pinatim nan asawam dakapay kinan nan inbagak en adiyo kankanen. Gapo isnan inikkam et baosek nan lota isonga masapol ay menligatka ay men-obla isnan lota enggana isnan katatagowam tasiyay waday ommaam is kanenyo

¹⁸ tay awnit tomobo nan loglogam ya sibsibit et awnit nan kankanenyo et logam.

¹⁹ Masapol ay menling-etka ay men-obla isnan lota esapay waday kanenyo engganay somagongka isnan lota ay nagapowam. Tay nan lota nan nagapowam et awnitka kasin menbalin is lota no mateyka.”

²⁰ Nan ngadan san lalaki et Adam et nginadnana nan asawana is Eva tay siya nan inan nan am-in ay ipogaw.

²¹ Ninsapo nan apo ay Dios is badon da Adam ken Eva isnan kodil di animal.

²² Dat kanan nan apo ay Dios, “Id wani kaneg inawat san ipogaw sak-en isnan mangtekanda isnan gawis ya ngawi isonga masapol ay adida maipalobos ay kanen nan begas nan kaiw di biyag ta adida matatago ay eng-enggana.”

²³ Isonga dat pakaanen nan Apo ay Dios daida isnan galdin id Eden danat pakaykayen daida isnan lota ay nagapowanda.

²⁴ Et isnan batog di balaan di agew isnan galdin et inpaeyna nan babaana ay makwani en kerubim ya nan menposposipos ay menbidbidang ay kaneg ispada nan ilana. Siya dadi nan mangiyadi isnan somagsag-en isnan kaiw di biyag.