Genesis 21 - Kalin Apo Dios

Nan Naiyanakan Isaac 21:1-13

¹ Tinongpal nan apo din insapatana ay ikkana ay mangbindisyon ken Sara

² et maliton et iyanakna nan anakda ken Abraham ay lalaki issan timpo ay inbagan Apo Dios.

³ Dat ngadnan Abraham is Isaac

⁴ et idi maikawao ay agewna dat segyatan amana ay kaneg din inbilin Apo Dios.

⁵ Si Abraham et sin-gasot nan tew-ena isnan naiyanakan Isaac.

⁶ Kinwanin Sara, “Inpagasing Apo Dios sak-en. Awnit am-in ay mangdenge isnan inommat et makiammengda ken sak-en gapo isnan gasingda

⁷ tay sinoy mangwani en omanakak dakpay nain-iin-ina ya naam-aam-ama si Abraham!”

⁸ Idi napso san onga dat menpalti da Abraham tay siya di nan ogalida.

⁹ Dat makiay-ayam si Ismael ay anak Abraham isnan baana ay iyEgipto ken Isaac

¹⁰ dat ilaen Sara danat kanan ken Abraham, “Pakaanem nan baa ay naay ya nan anakna tay adiyak layden ay makitawid siya isnan kinabaknangmo ay tawiden Isaac ay anakko.”

¹¹ Dat dadama ay menseseg-ang si Abraham tay anakna gedan si Ismael.

¹² Ngem kinwanin Apo Dios ken Abraham, “Adika madanagan gapo isnan onga ya ken inana ay si Agar ay baam. Masapol ay ikkam nan am-in ay kanan Sara tay nan magapo isnan anakmo ay si Isaac nan aap-om ay inkalik ken sik-a.

¹³ Ngem awnitak gedan paadoadowen nan apon Ismael ay anak nan baam tay siya et anakmo gedan.”