Genesis 18 - Kalin Apo Dios

Inkalin Apo Dios Ay Maiyanak Si Isaac 18:1-15

¹ Isnan esay agew et ninpaila nan apo ken Abraham issan kad-an di kak-aiw id Mamre. Siya na nan inkana ay ninpaila. Idi itotokdon Abraham isnan pantewda isnan kag-aw

² danat ilaen ay wada nan tolo ay lalaki ay tomatakdeg isdi. Idi ilana daida danat ikakamo ay en mangsab-at ken daida.

³ Dat men-galalasing ay mangwani, “Gagayyem, akayo adi ta entako menlang-ay isnan baeymi.

⁴ Mangseseed kayo isnan poon di kaiw ay naay ta eyak omala is danom is idenasyo

⁵ dakpay omala gedan is bassit ay makan ta waday ikilegyo ay mendaan ay omey is ayanyo. Dadama nan gasingko isnan inmaliyanyo isnan baeyko.” Dadat kanan, “Men-gasing kami abes ay inmali isnan kad-anyo.”

⁶ Inkakamon Abraham ay songgep danat kanan ken Sara, “Ikamom kad ay men-oto is gawis ay tinapay tay wada nan sangaili tako.”

⁷ Dat tomagtag et omey isnan kad-an di talakena et piliyena nan menlames ay anak di baka et idyana isnan baana danat kanan, “Ikamom ta paltiyem sa dakat otowen.”

⁸ Nakaoto pay si asawana ya san baana dat men-ala si Abraham issan inotoda ya is gatas danat omey pakanen nan sangailida issan poon di kaiw.

⁹ Idi nakakanda dadat kanan ken Abraham, “Into pay si Sara ay asawam?” Danat kanan, “Wada id leem.”

¹⁰ Dat kanan nan esa ken daida ay nan apo, “Isnan maikasiyam ay bowan daket mensagong isna tay siya di nan mang-ipailaak isnan kabaelak ken Sara ay asawam tay awnit omanak is lalaki.” Ngem si Sara et wada isnan dokog di eneb ay mang-inanaag isnan kankananda.

¹¹ Si Abraham et naam-aam-ama ya nain-iin-ina abes si Sara et natdok nan basana

¹² isonga dat men-ammeng si Sara et kanana isnan nemnemna, “Ay tet-ewa ngen ay omanakak dakpay nain-iin-ina ya naam-aam-ama gedan si asawak?”

¹³ Dat kanan nan apo ken Abraham, “Dan aped men-am-ammeng si Sara ay mangnemnem no tet-ewa ay omanak siya dapay nain-iin-ina?

¹⁴ Ay kanana en waday adi mabalin is ikkak ay apo? Ngem awnit tomet-ewa san kinwanik tay isnan maikasiyam ay bowan daket mensagong isna tay siya di nan omanakan Sara.”

¹⁵ Ngem gapo tay omegyat si Sara isonga inisotna ay mangwani, “Egayak met nin-ammeng.” Ngem kinwanin Apo Dios, “Nin-ammengka met ah.”

Nan Ninseg-angan Abraham Pala Isnan iSodoma 18:16-33

¹⁶ Kinwanina di dat ipangon Abraham san lalalaki enggana isnan maoosdongan di Sodoma.

¹⁷ Dat kanan nan apo isnan nemnemna, “Waay ipagtekko ken Abraham nan awnitko ikkan id Sodoma ya id Gomorra

¹⁸ tay siya nan pinilik ay apon di ipogawko ya inbagak en awnit omadoado nan ap-ona. Gapo ken siya et awnitak badangan nan adoado ay ipogaw isnan kailiili.

¹⁹ Pinilik siya tasiyay ibilina koma isnan an-akna ya ap-ona ay tongpalenda sak-en ya ikkanda nan gawis ya osto. No siya di nan ikkanda et tongpalek am-in ay insapatak ken siya.”

²⁰ Isonga dat kanan nan apo ken Abraham, “Dinngek nan dadama ay ngawi ay ik-ikkan nan ipogaw id Sodoma ya id Gomorra et masapol ay madosada.

²¹ Id wani lomayogak ay mang-ila no tet-ewa nan dinngek ta engewek daida.”

²² Dat komaan san dowa ay lalalaki et omeyda id Sodoma ngem nan apo et nataynan ken Abraham.

²³ Dat kanan Abraham isnan apo, “Ay tet-ewa ay engewem am-in ay ipogaw isdi olay no gawis nan tap-ina?

²⁴ No kaspangaligan waday limampoo is gawis ken daida, ay engewem kayet nan sinpangili? Ay adi mabalin ay adim engewen tasiyay adi katey san limampoo?

²⁵ Waay adim tet-ewa itapi ay mangpatey isnan gawis! Baken kapapati ay ikkam di! Tay no siya di nan ikkam et maitapi ay madosa nan gawis isnan ngawi. Waay baken di is ikkam tay nan mangbanag isnan am-in ay ipogaw et masapol ay osto nan ik-ikkana.”

²⁶ Dat teben nan apo, “No waday das-ak is limampoo is gawis id Sodoma et adiyak engewen nan ilida gapo ken daida.”

²⁷ Kinwanin kasin Abraham, “apo, gapo tay inlogik ay ninkali et palobosam koma sak-en ta itoloyko nan kayatko ay kanan olay no apedak ipogaw et kedeng.

²⁸ No kaspangaligan pay waday epatpoo ya lima is gawis, ay engewem kayet tay kolang is lima?” Dat teben nan apo, “Adiyak engewen no waday epatpoo ya lima is gawis.”

²⁹ Dat itoloy Abraham ay mangwani, “No pay waday epatpoo et kedeng?” Dat kanan nan apo, “Adiyak engewen no waday epatpoo.”

³⁰ Dat kanan Abraham, “apo, pangaasim ta adika makalkaliget no menkaliyak kayet. No pay waday tolompoo et kedeng?” Dat teben nan apo, “Adiyak engewen no waday tolompoo isdi.”

³¹ Dat kanan Abraham, “Pangaasim Apo ta pakawanem sak-en isnan mangitoloyak ay menkali. No kaspangaligan pay waday dowampoo et kedeng?” Dat teben kasin nan apo, “Adiyak engewen no waday dowampoo.”

³² Dat kanan Abraham kayet, “Pangaasim Apo ta adika makalkaliget ta kanak na et kedeng. No pay simpoo et kedeng nan wada?” Tinban kasin nan apo, “Adiyak engewen no waday simpoo is gawis isdi.”

³³ Idi nakakali nan apo dat komaan dapay somaa si Abraham.