Genesis 15 - Kalin Apo Dios

Nan Nakitolagan Apo Dios Ken Abram 15:1-18

¹ Nakwas pay di dat menpaila nan apo ken Abram danat kanan, “Adika omegyat Abram tay salaknibak sik-a isnan kaeegyat dakpay agtan sik-a is gawis.”

^2-3 Ngem dat kanan Abram, “apo ay kangatowan, damen aped iyali dasa dapay maid anakko is awnit mangtawid? Kedkedeng si Eliezer ay iDamasco ay baak ay tinalakenko is awnit mangtawid isnan kokwak tay maid inyalim is anakko.”

⁴ Ngem dat kanan nan apo, “Baken san baam is awnit mangtawid isnan kokwam nodi nan anakmo.”

⁵ Danat ibaga en bomala si Abram danat kanan, “Tangadem pod id daya dakat padasen ay mangbilang isnan talaw tay awnit kaneg todi nan kaad-adon nan ap-om.”

⁶ Adi mendowadowa si Abram isnan kankanan nan apo isonga gawis nan pangiilaan nan apo ken siya.

⁷ Danat kanan ken Abram, “Sak-en nan apo ay nang-ibala ken sik-a id Ur id Babilonia ta idyak ken sik-a nan naay daga ay menkowam.”

⁸ Ngem dat kanan Abram, “apo ay kangatowan, ngan di esak mangtekan ay awnitak menkowa sa?”

⁹ Dat kanan nan apo, “Omyalika is baka, kalding ya kalnilo ay sagtotlo nan tew-enda ya is dowa ay koyat ay kalapati ya pagaw.”

¹⁰ Danat iyey am-in dana isnan apo et amam-asena danat ippey nan am-asda isnan sagang nan amasda ngem egayna inamam-as nan koyat.

¹¹ Dat om-omey nan gayang ay mangtopkay ngem dat abowen Abram daida.

¹² Idi lomlomnek et nan agew dat maseyeseyep si Abram danat liknaen nan pilmi ay egyat tay adina getken nan awnit ommat.

¹³ Dat kanan nan apo, “Nan ap-om et awnitda omey isnan addaaddawi ay ili et mabab-aada ya mapalpaligatda is epat gasot ay tew-en.

¹⁴ Ngem awnitko dosaen nan mangpaligat isnan ap-om et gapo isnan madosaanda et awnitda ipalobos nan ap-om ay komaan isdi ya awnit adoado nan kinabaknang ay ikaanda.

¹⁵ Ngem sik-a et gawis nan biyagmo ya maam-aam-amaka esakapay matey.

¹⁶ Sokod isnan maikap-at ay bonatmo esapay somagong nan aap-om id isna tay adi pay laeng mapakaan nan Amorreo isna engganay maanay on-ona nan basbasolda ay madosaanda.”

¹⁷ Ostoy linomnek et nan agew ay bomolinget daet mawada nan men-as-asok ay pag-otowan ya nan menbidbidang ay silew ay lomaos isnan gawan san naamam-as ay talaken.

¹⁸ Et siya na nan nakitolagan nan apo ken Abram ay nangwaniyana en, “Isapatak ay idyak isnan ap-om nan am-in ay daga ay menlogi isnan beddeng di Egipto enggana isnan ginawang ay Eufrates.” Kinwanin Apo Dios en agtana si Abram is adoado is ap-ona ngem si Sarai ay asawana et adi kayet omanak isonga dat ibagan Sarai ken Abram en iseyepna si Agar ay baan Sarai tasiyay omanakda. Dat omanak tet-ewa si Agar is lalaki dat ngadnan Abram is Ismael.