Genesis 13 - Kalin Apo Dios

Nan Ninsiyanan Da Abram Ken Lot 13:1-18

¹ Idi kinmaan da Abram id Egipto et inmeyda kasin isnan abagatan di Canaan et nakkey da Lot.

² Si Abram et kinmadakadangyan tay wada nan adoado ay kalnilona, kalding, baka, balitok ya nan tap-in di nabanol ay bonagna.

³ Kinmaanda kasin isdi et nin-at-atonda isnan kailiili ay menpaey id Betel et datnganda kasin san bilig ay ninteteanda id kasin ay ninbaetan nan Betel ya Ai

⁴ ay nangsapowana isnan mangpop-oowana is igasgasingna isnan apo et daydayawen Abram nan apo isdi.

⁵ Si Lot et wada gedan nan pamilyana ya nan baana, nan ad-ado ay kalnilo, kalding ya nan bakana

⁶ isonga adi omanay nan menpastolanda ay dowa no mapoponokda tay adoadoado nan talakenda ya wada gedan nan talaken nan iCanaan ya nan tap-in di ipogaw isdi.

⁷ Isonga kasasanape nan mangbanbantay isnan talaken da Abram ken Lot.

⁸ Dat kanan Abram ken Lot, “Kaanakak sik-a et nan babaam ya nan babaak et adida koma mensapsape isonga masapol ay mensiyanta.

⁹ Dakkel nan naay ay ili. Kadya, menpilika is laydem is omayanyo. No laydem ay omey isnan teken et menteteak isna ngem no isna nan laydem et omeyak abes isnan teken.”

¹⁰ Idi kinwanina di dat mentamaang si Lot isnan batog nan balaan di agew et ilana nan nadadata ay annaannawa ay sag-en di ginawang ay Jordan enggana id Zoar. (Siya di din egay pay laeng nang-engewan nan apo isnan ili ay Sodoma ya Gomorra.) Inilana ay adoado nan danom ya gawis nan lota isdi ay kaneg id Eden ya nan daga id Egipto

¹¹ isonga siya di nan pinilina. Inmeyda isdi ay sinbaey ay nanakkey nan babaana ya nan talakena. Siya na nan inkakkan da Abram ken Lot ay ninsiyan.

¹² Da Abram et nataynanda id Canaan dapay omey da Lot isnan nadadata ay sag-en di ginawang ay Jordan ay kad-an di il-ili. Dadat mentee isnan benget nan ili ay Sodoma.

¹³ Nan ipogaw isdi et ngawi nan ik-ikkanda et dadama nan basolda isnan apo.

¹⁴ Idi kinmaan da Lot dat kanan nan apo ken Abram, “Isnan kad-am et tamaangem ay gawis nan am-in ay naliliwes

¹⁵ tay idyak ken sik-a ya nan ap-om nan am-in ay iilaem et kowayo ay eng-enggana.

¹⁶ Awnitak agtan sik-a is adoadoado ay apo et maiwed makabilang ken daida am-in nodi nalaklaka ay mabilang nan lagan isnan batawa no daida.

¹⁷ Id wani omeyka ta tamaangem nan dakedake ay ili isna tay idyak am-in ken sik-a.”

¹⁸ Isonga dat men-aton da Abram et menteeda isnan sag-en nan kak-aiw id Mamre id Hebron dat mensapo isdi is mangpop-oowana is igasgasingna isnan apo.