Genesis 11 - Kalin Apo Dios

Nan Nangteknan Apo Dios Isnan Kalin Di Ipogaw 11:1-9

¹ Issan deey ay timpo et paliso nan kalin nan ipogaw isnan batawa.

² Idi omad-ad-ado nan ipogaw et maiwakatda enggana isnan nadadata ay logal ay Sinar dat mentee nan tap-ina isdi.

^3-4 Dadat men-asikwani ay men-et-etek, “Ala, mensapo tako is gawigawis ay ili isna. Mensaad tako pay is andoando is baey ay omdan id daya tasiyay masdaaw am-in nan ipogaw no ilaenda nan inikkan tako ya ta adi tako kaiwakat isnan batawa.” Isonga dadat men-ala is kolayeng et poowanda tasiyay komenteg ay kaneg bato dadapay men-ala is niket ay mang-ipket isnan kolayeng isnan mangtopinganda.

⁵ Idi sas-aadenda di dat ilaen nan apo nan ili ya nan andoandoando ay baey ay sapsapowenda

⁶ danat kanan, “Mabalin ay ikkanda na tay mapoponokda ya paliso nan kalida. Siya na nan menlogyan nan ik-ikkanda et awnitda itoltoloy ay aped mang-ikkan isnan laylaydenda no adida maipasaldeng

⁷ isonga masapol ay tekneteknek nan kalida tasiyay adida menkinaawatan.”

⁸ Et gapo tay adida menkinaawatan dadat isaldeng san sas-aadenda dat komaan nan tap-ina et omeyda isnan nateketeken ay ili isnan batawa.

⁹ San ili ay deey et nangadnan is Babilonia tay isdi nan nangteketekenan nan apo isnan kalin di ipogaw tasiyay masis-iyanda. Naayda nan ap-on Sem ay anak Noe. Si Sem nan aman Arpaksad. Si Arpaksad nan aman Sela. Si Sela nan aman Eber. Si Eber nan aman Peleg. Si Peleg nan aman Reu. Si Reu nan aman Serug. Si Serug nan aman Nahor. Si Nahor nan aman Tera.

Si Sem Enggana Ken Abram 11:27-32

²⁷ Si Tera nan aman da Abram, Nahor ya Haran. Si Haran nan aman da Lot, Milca ya si Iska

²⁸ ngem natey si Haran isnan ilida id Ur ay sakop di Babilonia dapay deda nan amana.

²⁹ Dat asawaen Nahor nan kaanakana ay si Milca ay anak Haran dapay asawaen Abram si Sarai

³⁰ ngem adi omanak.

³¹ Isnan namingsan et inayagan Tera nan anakna ay si Abram, nan apona ay si Lot ay anak Haran ya nan inapona ay si Sarai ay asawan Abram et komaanda id Ur ay sakop di Babilonia et omeyda koma id Canaan ngem idi inomdanda id Haran dadat mentee isdi.

³² Et isdi nan nateyan Tera issan kadowan gasot ya lima nan tew-ena.