Ezekiel 47 - Kalin Apo Dios

Nan Ginawang Ay Nagapo Isnan Templo 47:6-12

⁶ Wada nan am-ama ay nangwani ken sak-en en, “Sik-a ay ipogaw, inenemnemmo ay gawis am-in dana.” Danat isagong sak-en isnan benget di ginawang.

⁷ Idi omdanak isdi daket ilan ay adoado nan kaiw isnan mensinombangil.

⁸ Danat kanan en, “Nan naay danom et men-ayos isnan bandan nan balaan di agew daet menpaey isnan tanap nan Jordan ya isnan makwani en Natey ay Baybay. No men-ayos isnan Natey ay Baybay et sokatana nan mensidek ay danom isdi is gawis ay danom ta adi mensidek.

⁹ Isonga am-in ay men-ayosan nan danom ay naay et mawada nan nateketeken ay ikan ya animal isnan sag-ena. Pagawisen nan naay danom nan danom isnan Natey ay Baybay. Am-in ay daanen nan danom ay naay et maagtan is biyag.

¹⁰ Et menlogi isnan En-gedi et enggana isnan En-eglaim et wada nan pagsidokan di ikan. Adoado nan nateketeken ay ikan isdi ay kaneg nan wada isnan Baybay ay Mediterranean.

¹¹ Ngem adi maitapi ay mapagawis nan danom isnan napopokong isnan benget di baybay tay siya nan magapowan di asin.

¹² Isnan sinombangil di ginawang et awnit tomobo am-in ay ilan di kaiw ay makan nan begasda. Adi kaang-ango nan toboda ya adi somalsaldeng nan menbegbegasanda. Binowan ay wada nan gawis ay begasda gapo isnan kanayon ay masibsiboganda issan danom ay magapo isnan Templo. Bomgas is makan nan deeyda ay kaiw dapay maosal ay agas nan toboda.”