Ezekiel 34 - Kalin Apo Dios

Nan Mang-ipaspastol Isnan Israelita 34:1-17

¹ Nakikali nan apo ken sak-en

² et kanana, “Sik-a ay ipogaw, pabasolem nan deeyday mentolay isnan Israel. Ipadtom ken daida ay mangibaga en sak-en ay apo et siya na nan kanak. ‘Nabeddengan kayo, dakayo ay kaneg menpaspastol isnan Israelita. Daida ay kanegyo kalnilo nan ayowananyo koma ngem aped nan aw-awakyo nan as-asikasowenyo obpay.

³ Nagapo ken daida nan osalyo ay nan kagawisan ay makan ya bado dayopay paltiyen nan kagawisan ta isdayo ngem adiyo polos asikasowen daida.

⁴ Egayyo binantayan nan nakapsot, inagasan nan nasakit, binedbeddan nan nasogat ya egayyo pinasagong nan inmey isnan ad-addawi wenno inanap nan naamas nodi pinalpaligatyo daida.

⁵ Gapo tay maid mang-ipaspastol ken daida et naiwakatda dapay isdan di atap ay animal nan tapina.

⁶ Isonga naiwakatda isnan bilbilig ya isnan am-in ay solin nan batawa daet maid nang-ikaskaso is mang-anap ken daida.

⁷ Et id wani dengngenyo koma ay menpastol nan kankanak ay apo.

⁸ Nan katet-ewan nan matatagowak ay Dios et siya nan kaneg nan katet-ewan nan naay kalik. Nan kalnilok et dinpap ya pinatey di atap ay animal dadapay isda tay maid od mangbabantay ken daida. Nan palapastolko et egayda inanap nan kalnilok nodi nan awakda nan ay-ayowananda et kedeng.

⁹ Isonga dengngenyo sak-en, dakayo ay menpaspastol,

¹⁰ sak-en ay apo et ibagak ken dakayo en kaiingek dakayo. Alaek nan kalnilok et adiyak ipapaspastol kasin ken dakayo ya adiyak et ipalobos ay kedeng nan aw-awakyo is as-asikasowenyo. Salaknibak nan kalnilok ta adiyo et is-isda daida.

¹¹ Sak-en ay kangatowan ay Dios et kanak pay en sak-en mismo nan mang-anap isnan kalnilok daket ayowanan daida

¹² ay kaneg nan ikkan di menpaspastol isnan kalnilo ay naiwakat dat kasin madagop. Alaek daida isnan naiwakatanda isdin deey ay menbolinget ya kaeegyat ay agew.

¹³ Awnitko alaen daida isnan nateketeken ay il-ili ay inmayanda daket dagopen daida ta isagongko daida isnan osto ay ilida ay id Israel. Awnitko pakanen daida isnan kad-an di mentaba ay logam isnan bilbilig ya isnan kad-an di men-ay-ayos ay danom.

¹⁴ Awnitda mangmangan isnan bilbilig ya isnan am-in ay pagpastolan ay kad-an di ado ay logam isnan Israel ay maid iyeg-egyatda.

¹⁵ Sak-en mismo ay apo nan mang-ipastol isnan kalnilok dakpay iyanapan daida is pag-illenganda. Sak-en ay apo nan ninkali.

¹⁶ Awnitak anapen nan naamas dakpay ipasagong nan inmaddawi dakpay bedbedan nan nasogatan ya agasan nan nasakit. Ngem nan mentatba ya napigsa et awnitak dadaelen tay esaak ay menpaspastol ay mang-ikkan is gawis.

¹⁷ Et id wani siya na nan kanak ay apo ken dakayo ay pastolko. Awnitak banagen dakayo ay sag-es-a ta isiyanko nan gawis isnan ngawi ay kaneg nan kalnilo isnan kalding.’ ”