Ezekiel 2 - Kalin Apo Dios

¹ Kinwanina en, “Tomakdegka ay ipogaw tay wada nan ibagak ken sik-a.”

² Et isnan menkalkaliyana dat kapten nan Ispiriton Apo Dios sak-en et mangpatakdeg. Daket dengngen pay san kali ay mangwani en,

³ “Sik-a ay ipogaw, ibaak sik-a isnan Israelita. Sinmokilda dadapay inadyan sak-en. Nasokilda ay kaneg din alal-apoda id kasin.

⁴ Menkenteg nan toktokda et adida mangibain isonga sak-en ay kangatowan ay Dios et ibaak sik-a ay mang-ipagtek ken daida isnan kanak.

⁵ Idngeda man wenno adi sik-a ngem awnitda getken ay wada nan mamadto ay naibaa ken daida.

⁶ Ngem sik-a ay aped ipogaw et adika omeg-egyat ken daida wenno isnan kompolni ay kankananda. Awnitda adyan ya oyawen sik-a et awnit kanegka wada isnan kad-an di kagayagayaman. Olay no keg todi et adika omeg-egyat isnan nasokil ay ipogaw wenno isnan kompolni ay kankananda.

⁷ Ibagam kayet ken daida nan am-in ay kanak ay olay no adida dengngen tay gegetkem ay nasokilda.”