Ezekiel 18 - Kalin Apo Dios

Nan Nakabasol Nan Madosa 18:1-4 , 25-32

¹ Inbagan nan apo ken sak-en en,

² “Dadan kankanan nan naay pangwani ay maipanggep isnan Israelita en, ‘Nan am-a nan nangkakan isnan men-alsem ay obas ngem aped nan an-akda nan nangilo nan bab-ad.’

³ Ngem sak-en ay kangangatowan ay Dios et kanak en nan katet-ewan nan matatagowak ay Dios et siya nan kaneg nan katet-ewan nan adiyo et mangmangwaniyan issan deey ay pangwani maipanggep nan Israelita.

⁴ Tay kowak am-in ay biyag di ipogaw ay nan biyag di ama ya olay nan biyag di anakna. Et nan ipogaw ay menbasol et siya met laeng nan matey.

²⁵ Ngem kananyo en, ‘Baken osto nan ik-ikkan nan apo.’ Dengngenyo sak-en dakayo ay Israelita. Ay kananyo en baken osto nan ik-ikkak? Nan ik-ikkanyo nan baken osto.

²⁶ No isaldeng nan nalinteg ay mang-ik-ikkan is gawis ta ilogina ay mang-ik-ikkan is ngawi et matey gapo isnan ngawi ay ik-ikkana.

²⁷ Et nan ngawi pay ay ipogaw, no isaldengna ay menbasbasol danat ikkan nan gawis ya nan osto et isalakana nan biyagna.

²⁸ Tay getkena et ay ngawi nan ik-ikkana danat isaldeng ay menbasbasol tasiyay adi katey nodi itoltoloyna ay matatago.

²⁹ Dakayo ay Israelita et kananyo en, ‘Baken osto nan ik-ikkan nan apo ay Dios.’ Kananyo ngen od en baken osto nan ik-ikkak. Dapay nan ik-ikkanyo nan baken osto.

³⁰ Id wani et sak-en ay apo ay Dios nan mangmangwani ken dakayo ay Israelita en awnitak okomen dakayo ay sag-es-a sigon isnan wasdinyo inik-ikkan. Dokoganyo od nan ngawi ay ik-ikkanyo ta adiyo ipalobos ay dadaelen nan basbasolyo dakayo.

³¹ Isaldengyo am-in nan ngawi ay ik-ikkanyo dakayot pabalowen nan nemnemyo. Ayta dakayon layden ay matey, dakayo ay Israelita?

³² Sak-en ay kangatowan ay Dios et kanak en adiyak layden ay waday matey. Taynanyo et od nan basbasolyo ta matago kayo.”