Ezekiel 1 - Kalin Apo Dios

Nan Tokdowan Apo Dios 1:3-5a , 15-22 26-28

³ Sak-en si Ezekiel ay padi ay anak Buzi. Isnan kawad-anmi id Babilonia isnan bas-ang di ginawang ay Kebar et dinngek nan kalin nan apo daket liknaen nan panakabalina.

⁴ Idi mentangadak daket ilaen nan dakkel ay napoponok ay liboo ay wada nan kimat ya kido isnan leemna ay inkakawit di napigsa ay dagem ay nagapo isnan amyanan. Menpat-a nan liliwesena isnan daya ya isnan magapgapowan nan kimat et wada nan mensilsilap ay kaneg gambang.

^5a Isnan gawan nan liboo et inilak nan kanega epat ay matatago.

¹⁵ Issan mang-iilaak isnan epat ay matatago daket ilaen nan epat ay pilid ay maisisikgad isnan lota isnan sag-en nan wasdin esa ken daida.

¹⁶ Am-in nan epat ay pilid et naiis-o. Menkimkimatda ay kaneg nan nangina ay bato dapay wada nan tapin di pilid isnan wasdin leem san deeyday pilid ay teken nan tolongena.

¹⁷ Isonga mabalin ay mendaan nan pilid isnan am-in ay epat ay soli.

¹⁸ Kamatamata nan nangkokobot isnan benget san pilid.

¹⁹ Et no basta mendaan nan matatago dat mendaan abes nan pilid. No abes ngomatoda dat abes ngomato nan pilid.

²⁰ Mabalin ay is kaykayatda ay omay-ayan. Am-in ay ik-ikkan san matatago et ik-ikkan abes san pilid tay nan deeyday matatago nan mangtetengel isnan pilid

²¹ isonga basta mendaan nan matatago et mendaan abes nan pilid. No ngomatoda et ngomato abes nan deeyday pilid.

²² Isnan oolowan nan deeyday matatago et wada nan kaneg daya ay nasapo isnan mensilsileng ay kaneg salming ay makwani en kristal.

²⁶ Isnan ngangatowenda id daya et wada nan kaneg tokdowan di ali ay nasapo isnan nangina ay bato ay makwani en safiro. Dat issan deey tokdowan di ali et wada nan kaneg ipogaw ay tomotokdo.

²⁷ San deey tomotokdo et mensilsilang ay kaneg nan gambang isnan gawan di apoy et sisilawana nan naliliwes.

²⁸ Wada nan am-in ay kolor di batikaang isnan silawna. Siya na nan makasili ay silaw ay mangipaila isnan kawad-an nan apo. Isnan nangilaak isnan naay daket menlokbob daket dengngen nan kali.