Exodo 9 - Kalin Apo Dios

Nan Nateyan Di Katalatalaken 9:1-7

¹ Dat kasin kanan nan apo ken Moses en, “Omeyka kasin isnan ali ta ibagam en kinwanin nan apo ay Dios di Hebreo en, ‘Palobosam nan ipogawko ta omalida mendayaw ken sak-en.

² Tay no adim kasin kayten ay mangipalobos ken daida

³ et dosaek dakayo ay mangipaali is pisti isnan am-in ay talakenyo ay nan kabayo, kamelio, baka, kalnilo ya nan kalding.

⁴ Ngem awnitak iitken nan talaken nan Israelita isnan talaken nan iyEgipto ta maid matmatey ay talaken di Israelita.

⁵ Sak-en nan apo et awnitko ikkan dana is wakgat.’ ”

⁶ Kawakgatana pay dat tet-ewa ikkan nan apo san kinwanina. Adoado nan natey ay talaken di iyEgipto dapay maid polos natey isnan talaken di Israelita.

⁷ Ninsos-oot san ali et gintekna ay maid polos natey isnan talaken di Israelita ngem kayetna pinakedse nan nemnemna et egayna pinalobosan nan Israelita.

Nan Naboyoyan Nan Ipogaw Ya Nan Talakenda 9:8-12

⁸ Nakwas pay di dat kanan nan apo ken da Moses ken Aaron en, “Omala kayo is sinkaakop ay dapo isnan pagdamdamiliyan ta isapowak Moses id ngato isnan sagang nan ali.

⁹ Et awnit maiwakat ay kaneg tapok isnan am-in ay ilin di Egipto dat pawad-en nan tapok nan boyoy isnan am-in ay ipogaw ya talaken nan iyEgipto dat mabtak nan boyoy et kaneg gaddil is men-is-isiis.”

¹⁰ Dadaet omala is dapo et omeyda issan ali. Dat isapowak Moses id ngato san dapo daet tet-ewa maboliw nan boyoy ay ninbalin is gaddil ay men-is-isiis isnan ipogaw ya talaken di iyEgipto.

¹¹ Olay nan deeyday mensalsalamangka et adida masagang si Moses tay napno gedan nan awakda is boyoy ay kaneg nan tap-in di iyEgipto.

¹² Ngem olay no keg tona et inpakedsen kayet san ali nan nemnemna et egayna kayet idnge da Moses ken Aaron ay kaneg din kinwanin nan apo ken Moses.

Nan Nindalalowana Is Napigsa 9:13-35

¹³ Nakwas pay di dat kanan kasin nan apo ken Moses en, “Masapaka is wakgat ta omeyka isnan ali ta ibagam en kinwanik en, ‘Sak-en ay apo ay Dios di Hebreo et kanak en palobosam nan ipogawko ta omalida ay mangdayaw.

¹⁴ Tay id wani et am-amedko dosaen sik-a, nan oopisyalismo ya nan ipogawmo ta manggetkanyo ay maid polos kanegko isnan batawa.

¹⁵ Tay no kinayatko ay aped ipaila nan kabaelak ay mangdosa ken dakayo is sakit et natey kayo et am-in.

¹⁶ Ngem inpalobosko ay matago kayo ta ipailak ken dakayo nan kabaelak tapno maipagtek isnan batawa nan kabaelan nan ngadanko.

¹⁷ Dakapay kayet lastog ay adim palobosan nan ipogawko ay komaan isnan ilim.

¹⁸ Isonga is wakgat isnan kegtona ay olas et awnitak men-ipaodan is pilmi ay dalalo ay egay inom-ommat id kasin ay enggana ay nawada nan ili ay Egipto.

¹⁹ Isonga id wani et ipalinongmo et nan talakenmo ya nan am-in ay wada isnan deya tay awnit pilmi nan dalalo ay maekdag et mapontaan am-in ay ipogaw ya talaken ay egay kailinong et mateyda am-in.’ ”

²⁰ Inmegyat nan tap-in di oopisyalis gapo isnan kinwanin nan apo isonga inpalinongda nan baada ya nan talakenda.

²¹ Ngem wadada nan egay nangikaskaso isnan kinwanin nan apo et binaybay-anda nan talakenda ya nan baada ay egay nangipalinong.

²² Dat kanan nan apo ken Moses en, “Ipangatom nan ledengmo ay mangdokyaw id daya ta matekdag nan dalalo isnan kaipoipogaw, nan talaken ya isnan am-in ay molmola isnan om-om-a ya paypayew nan iyEgipto.”

²³ Dat ingaton Moses nan sokodna id tag-ey et ipaey nan apo nan dalalo ya nan kido dapay makimat nan lota.

²⁴ Dadadadakke ay dalalo nan naekdag dapay maitatapi nan men-oonod ay kimat. Siya na nan kapipigsaan ay nin-odanana is dalalo id Egipto enggana isdin ninbalinana is ili.

²⁵ Pinontaan san dalalo am-in ay ipogaw ya talaken di iyEgipto ay wada issan deya. Pinontaana pay am-in ay molmola isnan om-a ya paypayewan ya nan kak-aiw et naspakda.

²⁶ Et kedeng id Gosen ay kad-an di Israelita is egay nindalalo.

²⁷ Dat paayagan san ali da Moses ken Aaron et kanana ken daida en, “Id wani et nakabasolak. Osto obpay nan apo. Sak-en ya nan ipogawko et nakabasol kami.

²⁸ Ilowaloyo kad isnan apo ta kedeng et di is kido ya dalalo. Owen, palobosak et dakayo ay komaan, adi kayo et mentetee isna.”

²⁹ Dat kanan Moses en, “Pagbalak isnan naay ili daket ipangato nan ledengko ay menlowalo isnan apo ta somaldeng nan naay kido ya dalalo et siya nan panggetkam ay kowan nan apo nan batawa.

³⁰ Ngem getkek ay sik-a ya nan iib-am et adiyo pay laeng iyegyat si Apo Dios ay apo.”

³¹ Nan tap-in di molan di iyEgipto et nakawasda tay naom nan begasda dapay nan tap-ina et iloglogida ay menbenga.

³² Ngem nan pageyda et egay nakawas tay maladladawda ay menbala.

³³ Dat taynan Moses san ali et komaan isnan ilin san ali danat ipangato nan ledengna ay menlowalo isnan apo daet somaldeng nan kido ya dalalo ya nan odan.

³⁴ Ngem idi inilan san ali ay ginmawis et nan timpo dat kasin menbasol et ipakedsena nan nemnemna. Siya ya nan iib-ana et inkekedseda kasin

³⁵ ay kaneg din kinwanin nan apo ken Moses isonga egay pinalobosan nan ali nan Israelita ay komaan.