Exodo 8 - Kalin Apo Dios

¹ danat kasin kanan ken Moses en, “Enka kasin issan ali ta ibagam en kanan nan apo en palobosam nan ipogawna ta omeyda mendayaw ken siya.

² Ngem no adim kayet palobosan daida et awnit ipaalina nan adoado ay tokak enggana ay mapno am-in nan itoltolayam.

³ Ponowena nan ginawang ay Nile is tokak isonga komaanda isnan ginawang et omeyda isnan baeymo, isnan pagseypam, isnan bab-aey nan iib-am ya ipogawmo ya olay isnan pag-otowan ya isnan kakandiloyo.

⁴ Mentaykoda ken sik-a ya isnan ipogawmo ya isnan am-in ay iib-am.”

⁵ Dat itoloy nan apo ay mangwani ken Moses en, “Kanam si Aaron ta isawadna nan sokodna isnan kaginaginawang, isnan ketketang, ya isnan posposong ta ipadakana am-in nan tokak ta maiwakatda isnan am-in ay ilin nan Egipto.”

⁶ Dat tet-ewa isawad Aaron nan sokodna isnan am-in ay danom di Egipto et domaka nan katokatokak et ponowenda nan am-in ay ilin nan Egipto.

⁷ Ngem ninsalamangka san deeyday mensalsalamangka et padakaenda abes nan tokak.

⁸ Dat paayagan san ali da Moses ken Aaron et kanana en, “Idawatyo isnan apo ta kaanena nan naayda ay tokak ken dakami et awnitak palobosan nan ipogawna ay omey men-idaton ken siya.”

⁹ Dat kanan Moses ken siya en, “Men-gasingak ay mangilowalo ken sik-a. Ibagam bawet no tongona nan mendawatak pala ken dakayo am-in et awnit komaan nan sanada ay tokak ta kedeng nan ginawang ay Nile is kad-anda.”

¹⁰ Dat kanan san ali en, “Ilowalom is wakgat.” Dat kanan Moses en, “Ikkak ay kaneg nan kaytem ay maikkan tapno pangtekam ay maid dios is kaneg nan apo ay Diosmi.

¹¹ Awnit komaan nan sanada ay tokak et awnit kedeng nan ginawang ay Nile is kad-anda.”

¹² Dat komaan da Moses ken Aaron et taynanda san ali. Kawakgatana dat menlowalo si Moses isnan apo ta kaanena san tokak ay inpaeyna.

¹³ Dinngen nan apo nan dawat Moses et natey san tokak ay sinonggep isnan bab-aey, isnan pantew ya isnan paypayewan.

¹⁴ Dat ponoken nan iyEgipto san natey ay tokak. Dadama ay sinmongsong san tokak isonga sinmongsong gedan nan ilin nan Egipto.

¹⁵ Ngem idi inilan nan ali ay natey san deeyday tokak danat kasin ipakedse nan nemnemna et egayna kasin pinati da Moses ken Aaron ay kaneg din kinwanin nan apo.

Nan Binmalaan Di Katilatilang 8:16-19

¹⁶ Nakwas di dat kasin kanan nan apo ken Moses en, “Kasinmo ibaga ken Aaron ta isaplitna nan sokodna isnan lota et awnit menbalin ay tilang nan tapok isnan am-in ay ilin nan Egipto.”

¹⁷ Dat tet-ewa isaplit Aaron nan sokodna isnan lota et ninbalin ay tilang nan am-in ay tapok id Egipto dadapay pomket isnan ipogaw ya talaken isdi.

¹⁸ Padasen pay abes nan deeyday mensalsalamangka ay menpabala is tilang ngem egayda nakaikkan. Natilangan am-in nan wada id Egipto

¹⁹ isonga dat kanan nan deeyday mensalsalamangka isnan ali en, “Tet-ewa ay si Apo Dios nan nang-ikkan isna.” Ngem inpakekedsen kayet san ali nan nemnemna et egayna kayet pinati da Moses ken Aaron ay kaneg din kinwanin Apo Dios.

Nan Binmalaan Di Kangilangilaw 8:20-32

²⁰ Dat kasin kanan nan apo ken Moses en, “Isnan wakgawakgat is wakgat dakat omey sab-aten nan ali no omey isnan ginawang dakat ibaga ken siya ay kinwanin nan apo en, ‘Palobosam nan ipogawko ta omalida mendayaw ken sak-en.

²¹ No adim palobosan daida et awnit ipaalik ken dakayo am-in nan kangilangilaw. Awnit mapno is ngilaw nan bab-aeyyo ya ap-apanda nan daga ay menteteanyo.

²² Ngem isnan agew ay deey et adiyak itapi nan ili ay Gosen ay kad-an nan ipogawko tapno maid ngilaw isdi et siya nan mangtekam ay sak-en ay apo et wadaak isnan batawa.

²³ Awnitko iitken nan ipogawko isnan ipogawmo, ommatna is wakgat.’ ”

²⁴ Dat tet-ewa ikkan nan apo dana et adoado ay ngilaw nan inmey isnan baey san ali, isnan bab-aey nan oopisyalisna ya isnan am-in ay dagan nan Egipto. Et ado nan nadadael id Egipto gapo isnan adoado ay ngilaw.

²⁵ Gapo is dana dat paayagan san ali da Moses ken Aaron et kanana en, “Enkayo men-idaton isnan Diosyo ngem id isna Egipto nan mang-ikkananyo.”

²⁶ Dat kanan Moses en, “Adi kabalin nan kanam tay awnit ligten nan iyEgipto dakami no ilaenda nan ogalimi ay menpalti is talaken ay igasingmi isnan apo ay Diosmi. No ilaenda nan menpaltiyanmi is talaken ay igasingmi dapay adyan nan iyEgipto nan keg todi et awnit gayangenda dakami ay mangpatey ken dakami.

²⁷ Masapol ay menbaat kami is tolo ay agew isnan pondag ta siya nan mangdayawanmi isnan apo ay Diosmi tay siya nan inbagana.”

²⁸ Dat kanan san ali en, “Palobosak ngalod dakayo ay omey men-idaton isnan apo ay Diosyo ngem adi kayo omaddaaddawi. Ilowalowanyo ngalod sak-en tapno makaan nan naay ligatko.”

²⁹ Dat kanan Moses en, “Pagkaanmi isna et idawatko isnan apo tasiyay is wakgat et komaan nan sanada ay ngilaw ta taynanda dakayo. Ngem adim kasin katkatogan dakami ay adi mangipalobos isnan naayda ay ipogaw ay omey men-idaton isnan apo.”

³⁰ Dat taynan Moses san ali et omey menlowalo isnan apo.

³¹ Dinngen nan apo nan dawat Moses et pinakaana san ngilaw issan ali ya nan iib-ana ya isnan ipogawna ay iyEgipto. Et maid polos nabay-an is olay esa ay ngilaw.

³² Ngem dat kasin pinakedsen nan ali nan nemnemna et egayna kasin pinalobosan nan ipogaw Apo Dios.