Exodo 7 - Kalin Apo Dios

¹ Dat kanan nan apo ken Moses en, “Dengngem nan kanak. Pabalinek sik-a ay kaneg dios isnan ali tay si Aaron ay besatmo et awnit siya nan kinatopekmo ay mangibagbaga isnan laydem ay ibaga ay kaneg nan ikkan di mamadto.

² Ibagam ken Aaron nan am-in ay inbilinko ken sik-a et awnit siya nan mangibaga isnan ali ta palobosana nan Israelita ay komaan isnan ilina.

³ Ngem awnitak ipakedse nan nemnem san ali ta adina idnge dakayo ay olay no adoado ay kaeegyat ay kaskasdaaw nan esak ipaila id Egipto.

⁴ Daket dosaen is mendagsen ay dosa nan iyEgipto daket ikaan nan ipogawko ay Israelita.

⁵ Isnan mangdosaak isnan iyEgipto ay mangikaanak isnan Israelita id isdi et awnit siya nan mangtekan nan iyEgipto ay sak-en nan apo.”

⁶ Dat ikkan da Moses ken Aaron nan am-in ay inbilin nan apo.

⁷ Et issan deey ay timpo ay nakikaliyanda issan ali et waompoo nan tew-en Moses dapay abes waompoo ya tolo nan tew-en Aaron.

Nan Sokod Aaron 7:8-13

⁸ Nakwas pay di dat kanan nan apo ken da Moses ken Aaron en,

⁹ “No kanan nan ali en omipaila kayo is kaskasdaaw ay mangpaneknek en inbaak dakayo dakat ibaga ken Aaron ta alaena nan sokodna ta itep-ana isnan sagang nan ali et menbalin ay oweg.”

¹⁰ Dat omey da Moses ken Aaron isnan ali et ikkanda nan inbilin nan apo. Intep-an Aaron nan sokodna isnan sagang nan ali ya isnan iib-ana dat tet-ewa menbalin is oweg.

¹¹ Dat paayagan nan ali nan mamasilib ya mensalsalamangka ay ipogawna et mensalamangkada abes dadapay ikkan nan inikkan Aaron.

¹² Wasdin esa ken daida ay mangitep-a isnan sokodna et ninbalin abes is oweg ngem ninkakan san sokod Aaron nan sokodda.

¹³ Dat kayet ipakekedsen san ali nan nemnemna ay kaneg san kinwanin nan apo en adi idngen nan ali da Moses ken Aaron.

Nan Ninbalinan Nan Danom Is Basa 7:14-24

¹⁴ Dat kanan nan apo ken Moses en, “Tet-ewa ay makedse nan ali isonga adina palobosan ay komaan nan Israelita.

¹⁵ Isonga is wakgat et omeyyo sab-aten nan ali no omey isnan ginawang ay Nile. Ikakawityo din pinabalinyo is oweg ay sokod dakayot sed-en siya isnan benget san ginawang.

¹⁶ No omdan san ali isdi dakat kanan ken siya en, ‘Inbaan nan apo ay Dios di Hebreo sak-en ay mangibaga ken sik-a en palobosam nan ipogawna ta omeyda mendayaw ken siya isnan pondag ngem enggana id wani et egaymo pinati.

¹⁷ Et id wani kanan nan apo en awnitmo getken no sino siya isnan naay ay ikkana. Ilaem ta isaplitko nan naay sokod isnan danom isnan naay ginawang et awnit menbalin ay basa.

¹⁸ Awnit matey am-in nan ikan et somongsong nan naay ginawang et awnit madogis kayo ay iyEgipto ay mang-inom isnan danom.’ ”

¹⁹ Dat kasin kanan nan apo ken Moses en, “Ibagam ken Aaron ta alaena san sokodna ta isawadna isnan am-in ay danom id Egipto isnan ketang, ginawang ya isnan sakdowan. Awnit menbalin is basa nan am-in ay danom isdi ya olay nan wada isnan kalamba ya isnan am-in ay maipaypay-an di danom.”

²⁰ Pinatin da Moses ken Aaron nan inbilin nan apo. Et isnan sagang san ali ya nan iib-ana dat tet-ewa isawad Aaron nan sokodna et isaplitna isnan ginawang dat menbalin nan danom is basa.

²¹ Natey nan ikan dat somongsong nan ginawang isonga adiyet mainom nan iyEgipto san deey danom. Ninbalin ay basa nan am-in ay danom id Egipto.

²² Ngem inikkan abes san deeyday mensalsalamangka isonga dat am-amed inpakedsen san ali nan nemnemna et egayna pinati da Moses ken Aaron ay kaneg san kinwanin nan apo.

²³ Dat somagong san ali isnan baeyna ay egayna polos inkaskaso san inikkanda.

²⁴ Am-in pay san iyEgipto et ninkaotda issan benget di ginawang ay Nile is omal-anda is inomenda tay adida mainom san danom isnan ginawang.

Nan Naipabal-an Nan Adoado Ay Tokak 7:25—8:15

²⁵ Nakwas pay nan pito ay agew enggana issan nangpabalinan nan apo is basa nan danom