Exodo 6 - Kalin Apo Dios

¹ Dat kanan nan apo ken Moses en, “Owen, ngem awnitmo ilaen nan ikkak isnan ali. Tay awnitak piliten ay mangipalobos isnan ipogawko. Kinatet-ewana et awnit mapilitan ay mangipakaan ken daida isnan ilina.”

² Dat itoloy Apo Dios ay mangwani en, “Sak-en nan apo.

³ Sak-en nan Dios ay manakabalin ay ninpaila id kasin ken da Abraham, Isaac yas ken Jacob ngem egayko inbaga ken daida nan ngadanko.

⁴ Inkalik ken daida gedan ay idyak ken daida nan bakenda kowa ay ili ay Canaan ay din ninteteanda.

⁵ Dat id wani ay dinngek nan mensegseg-anganda ay Israelita ay baan nan iyEgipto daket manemnem din inkalik.

⁶ Isonga kanam na isnan Israelita, ‘Sak-en nan apo, badangak dakayo ta mawayaan kayo isnan mendagsen ay ipaob-oblan nan iyEgipto ken dakayo. Ipailak nan panakabalinko isnan mangdosaak isnan iyEgipto ta isalakak dakayo.

⁷ Menbalinek dakayo ay ipogawko et sak-en nan Diosyo. Et awnityo mangtekan ay sak-en nan apo ay Diosyo ay nangwaya ken dakayo isnan dadama ay naligat ay ipaob-oblan nan iyEgipto ken dakayo.

⁸ Daket iyey dakayo isnan ili ay insapatak ay itedko ken da Abraham, Isaac yas ken Jacob. Itedko nan ili ay deey ta menkowayo. Sak-en nan apo.’”

⁹ Inbagan Moses dana isnan Israelita ngem egayda idnge gapo tay epdas nakaan nan namnamada isnan dadama ay napaligatanda.

¹⁰ Dat kanan nan apo ken Moses en,

¹¹ “Enka ibaga isnan alin di Egipto ay masapol ay palobosana nan Israelita ay komaan.”

Nan Inbilin Nan apo Ken Da Moses Ken Aaron 6:28—7:7

²⁸ Issan nakikaliyan nan apo ken Moses

²⁹ et kinwanina en, “Sak-en nan apo. Ibagam isnan alin di Egipto nan am-in ay ibagak ken sik-a.”

³⁰ Ngem dat kanan Moses en, “Getkem met ay bakenak nalaing ay menkali. Adi adi mangidnge nan ali.”