Exodo 34 - Kalin Apo Dios

Nan Maikadwa Ay Nadadampig Ay Bato 34:1-9

¹ Dat kasin kanan nan apo ken Moses en, “Somapoka kasin is dowa ay nadadampig ay bato ay kaneg san inmon-ona ta kasinko isolat din naisolat isdin bato ay ginpakmo.

² Dakat mensagana isnan masapa is wakgat ay tomikid isnan bilig ay Sinai ta mang-ilaka isnan toktok nan bilig.

³ Kedkedengka is tomikid tay masapol ay maid polos ipogaw is maila isnan kompolni ay paltin nan bilig. Maid gedan olay kalnilo wenno baka is mangmangan isnan poon nan bilig.”

⁴ Dat tet-ewa mensagana si Moses is dowa ay nadadampig ay bato et kawakgatana pay danat itikid dana isnan bilig ay Sinai ay kaneg san inbagan nan apo.

⁵ Dat lomayog nan apo ay naitatapi isnan liboo et tomakdeg isnan sag-en Moses danat kanan nan ngadana ay apo.

⁶ Dat lomaos isnan sasagangen Moses et kasina kanan en, “Sak-en nan apo ay Dios ay managseg-ang. Bakenak nalaka ay makaliget nodi managlayadak ya matalekak.

⁷ Tongpalek nan insapatak isnan kalibolibo ay kap-owan nan ipogawko dakpay pakawanen nan basbasolda. Ngem dosaek nan managbasol ay enggana isnan maikatlo ya maikap-at ay aan-ak ya aap-oda.”

⁸ Dat ikakamon Moses ay menlokbob et mendayaw.

⁹ Danat kanan en, “apo, no tet-ewa ay kagagasingmo sak-en et dawatek ay makkeyka ken dakami. Nasokil nan naayda ay ipogaw ngem pakawanem nan kangawimi ya nan basbasolmi ta dawatem dakami ay men-ipogawmo.”

Nan Nagapowan Moses Isnan Bilig Ay Sinai 34:29-35

²⁹ Issan linmayogan Moses isnan bilig ay Sinai ay ginegen-ana san dowa ay nadadampig ay bato ay kasin naisolatan san simpoo ay bilin et mensilsilap nan angasna ay adina getgetken gapo isnan nakikaliyana isnan apo.

³⁰ Idi ilaen da Aaron ya nan ipogaw ay mensilsilap nan angas Moses et omegyatda ay somag-en ken siya

³¹ ngem dat ayagan Moses daida. Daet somag-en si Aaron ya nan am-in ay aamam-an nan ili ken Moses et toyyena daida.

³² Dat abes somag-en am-in san Israelita danat ipagtek ken daida nan bilin ay inbagan nan apo ken siya isnan bilig ay Sinai.

³³ Makwas pay ay makikali ken daida danat salinan nan angasna is lopot.

³⁴ Et no tonggal omey si Moses isnan pagdaydayawan ay makikali isnan apo et kaanena nan salin nan angasna. Dat no bomala ay mangipagtek isnan Israelita nan am-in ay inbilin nan apo ken siya

³⁵ et mailada ay mensilsilap nan angasna. Danat kasin salinan nan angasna no makwas ay nin-ipagtek enggana ay kasin songgep issan kad-an nan apo ay makikali.