Exodo 33 - Kalin Apo Dios

Nan Inkalin Nan apo Isnan Ipogawna 33:12-23

¹² Dat kanan Moses isnan apo en, “Tet-ewa ay kinwanim en ipangok nan naayda ay ipogaw ay omey isnan daga ay kinwanim ngem egaymo inpagtek mo sino nan inbaam ay mangbadang ken sak-en dapay kinwanim en getkegetkem sak-en et kagagasingmo sak-en.

¹³ Et no tet-ewa ay kagagasingmo sak-en et ibagam ngalod nan laydem ay maikkan tapno getkek abes nan ikkak ay mensilbi ken sik-a tapno am-amedmo igasgasing sak-en. Adim kalkalingkingan ay pinilim nan naayda ay ipogaw ta men-ipogawmo.”

¹⁴ Dat kanan nan apo en, “Bowegek sik-a et awnitak pangabaken dakayo ta menlamlamnin kayo.”

¹⁵ Dat kanan Moses en, “No adika makkey ken dakami et adim ngalod pakakaanen dakami id isna.

¹⁶ Ngan pay obpay di mangtekanda en kagagasingmo nan ipogawmo ya sak-en no adika makkey ken dakami? Nan mangbowegam ken dakami et siya nan kail-ana ay wada nan naitkenanmi isnan tap-in di ipogaw isnan batawa.”

¹⁷ Dat kanan nan apo ken Moses en, “Ikkak nan inbagam tay getkegetkek sik-a dakpay kagagasing sik-a.”

¹⁸ Dat idawat Moses ay mangwani en, “Pangaasim kad ta ipailam nan somili ay kawad-am.”

¹⁹ Dat kanan nan apo en, “Owen, ipailak ken sik-a nan kinagawisko daket abes kanan nan nadiosan ay ngadanko. Sak-en nan apo et ipailak nan layadko ya seg-angko isnan laydek ay mangipailaan.

²⁰ Ngem adiyak ipaila nan angasko ken sik-a tay adi katago nan mang-ila isnan angasko.

²¹ Ngem wada nan bato isnan sikigak ay mabalinmo ay tomakdegan.

²² Et isnan lomaosak ay mangipaila isnan pilmi ay silapko et ippeyko sik-a isnan nakakaongan ay bato daket lingban sik-a enggana ay mallosak.

²³ No mallosak pay et awnitmo ilaen nan dokogko ngem baken nan angasko.”