Exodo 32 - Kalin Apo Dios

Nan Nangdayawan Nan Ipogaw Isnan Balitok Ay Sinangbaka 32:1-35

¹ Gapo tay nabayabayag si Moses issan bilig dat omey nan ipogaw ken Aaron et kananda ken siya en, “Ay ngan pay ngen nan inommat isnan kangadan is Moses ay nangibala ken dakami id Egipto? Isapowam et ngalod dakami is dios ay mangipangpango ken dakami.”

² Dat kanan Aaron ken daida en, “Kaanenyo ngalod nan balitok ay alitos nan as-awayo ya an-akyo ta iyaliyo ken sak-en.”

³ Daet kaanen nan deeyday ipogaw nan balitok ay alitosda et iyeyda ken Aaron.

⁴ Dat alaen Aaron et lonagena danat ippey isnan pagsokogan et sapowena is kaneg baka. Dat kanan nan deeyday ipogaw en, “Datako ay Israelita, siya na nan dios tako ay nangikaan ken datako id Egipto.”

⁵ Dat somapo si Aaron is altar isnan sagang san balitok ay baka danat kanan issan deeyday ipogaw en, “Is wakgat datakot menlagsak ta padayawan tako nan Apo tako.”

⁶ Kawakgatana pay dat omyey nan deeyday ipogaw isnan talakenda ay mapoowan ya nan tap-in di isdada ay igasingda pala isnan madagdagopanda. Dadaet mangan dadapay men-gasgasing ya men-in-inom et ninbalin san laglagsakda is ngawi tay menbotengda dadapay mended-een.

⁷ Dat kanan nan apo ken Moses ay daan isnan bilig en, “Ikamom ay lomayog tay nan ipogawmo ay inkaanmo id Egipto et ninbasolda dadapay inadyan sak-en.

⁸ Binaybay-anda san bilinko ay kanak en tongpalenda dadapay sinmapo is sinangbaka ay sinokogda isnan balitok et siya nan daydayawenda ya mang-idatonanda isnan pinaltida. Kankananda pay en siya di nan diosda ay nangikaan ken daida id Egipto.

⁹ Getkek ay nasokil dana ay ipogaw.

¹⁰ Isonga adim iyad-adi sak-en tay dadama nan ligetko ken daida et dosaek daida. Daket paad-adowen nan an-akmo ya nan aap-om engganay menbalin kayo ay napigsa ay sinpangili.”

¹¹ Ngem dat menpakpakaasi si Moses isnan apo ay Diosna et kanana en, “apo, adika koma makaliget isnan ipogawmo ay winayaam id Egipto isnan kabaelam ya panakabalinmo ay inpail-ilam.

¹² Awnit kanan pay nan iyEgipto en inbalam nan ipogawmo id Egipto gapo tay kaytem obpay ay mangpatey ken daida isnan bilbilig enggana ay maaminda. Pangaasim ta baewem nan ligetmo ken daida. Sokatam koma nan ninemnemmo ay ikkan ta adim dosdosaen nan ipogawmo.

¹³ Nemnemem da Abraham, Isaac ya si Jacob ay baam. Nemnemem din insapatam ken daida ay paadowem nan an-akda ya aap-oda is kaneg nan kaad-adon nan talaw isnan daya dakat idya ken daida nan daga ay inkalim ay kowada ay eng-enggana.”

¹⁴ Isonga daet ibabawin nan apo san kinwanina et egayna et dosaen nan ipogawna.

¹⁵ Dat lomayog si Moses ay nanggegeen issan dowa ay nadadampig ay bato ay naisolatan nan bilin et das-ana si Josue ay menseseed isnan gawan san bilig.

¹⁶ Si Apo Dios mismo nan nangsapo isnan nadadampig ay bato ay naay et insolatna san bilin isnan naayda ay bato.

¹⁷ Idi dinngen Josue nan menngabngabaan nan ipogaw danat kanan ken Moses en, “Dedengngek nan kaneg menngabngaba ay men-gobgobat isnan omap-apaan tako.”

¹⁸ Dat kanan Moses en, “Kaneg baken ngaban di nangabak wenno agan di naabak nan dedengngek nodi kaneg menkankanta.”

¹⁹ Idi nganngani ay omdan da Moses issan omap-apaanda et inilada san sinangbaka ya nan deeyday ipogaw ay mensalsala dat dadama nan ligetna danat men-ibkas san ginegen-ana ay bato isnan dalos poon nan bilig et nagpakda.

²⁰ Danat alaen san sinangbaka ay sinapsapoda et lonagena danat mekmemekmeken enggana ay dinmapo danat ilaok isnan danom sanapay ipainom isnan Israelita.

²¹ Danat kanan ken Aaron en, “Ay ngan nan inikkan nan naayda ay ipogaw ken sik-a ta inpalobosmo daida ay menbasol is mendagsen? Waay maid met.”

²² Dat kanan Aaron en, “Adika adi makaliget ken sak-en. Getkem met ay napigsa nan nemnemda ay men-ikkan is ngawi.

²³ Kinwanida ken sak-en en adida kano getken nan inommat isnan kangadan is Moses ay nangikaan ken daida id Egipto isonga isapowak kano daida is dios ay mangipangpango ken daida.

²⁴ Daket ibaga isnan wada nan balitok ay alitosda ta iyalida ken sak-en. Daket lonagen san alitosda et siya nan naay ay sinangbaka nan ninbalinana.”

²⁵ Ginteket Moses ay inpalobos Aaron nan deeyday ipogaw ay men-ikkan is ngawi et pinabalinda nan aw-awakda ay kababain isnan pang-iilaan nan mang-ap-apos ken daida.

²⁶ Dat itakdeg Moses isnan lowangan di ninkampowanda et ibibiyadna ay mangwani en, “Am-in ay mangkayat ay mang-onod isnan apo et omali isna.” Dat omey nan Levita ay aap-on din si Levi isnan kad-ana.

²⁷ Danat kanan ken daida en, “Inbilin nan apo ay Dios di Israelita en wasdinyo alaen nan gamigyo dayot liwesen nan naay ay ninkampowan tako ay menlogi isnan naay ay lowangan enggana isnan am-in ay solsolina ta pateyenyo nan bebsatyo, gagayyemyo ya nan sagsagogongyo.”

²⁸ Tinongpal nan Levita san kinwanin Moses et waay toloy libo ay lalalaki nan pinateyda issan deey ay agew.

²⁹ Dat kanan Moses isnan Levita en, “Id wani ay agew et pinabalinyo nan aw-awakyo ay padi isnan ninsilbiyanyo isnan apo isnan nangpateyanyo isnan an-akyo ya nan bebsatyo. Siya na nan gapo ay binindisyonan nan apo dakayo.”

³⁰ Kawakgatana dat kanan Moses isnan deeyday ipogaw en, “Ninbasol kayo is mendagsen ngem omeyak id wani isnan bilig ay kad-an nan apo baleng pay maidawatko ta pakawanena nan basolyo.”

³¹ Dat somagong si Moses isnan apo et kanana en, “Aye, ninbasol nan naayda ay ipogaw is mendagsen tay sinmapoda is dios ay balitok ay daydayawenda.

³² Ngem pakawanem koma nan basolda id wani. No adim pakawanen daida dakat kaanen ngalod nan ngadanko isnan liblo ay nangisolatam is ngadngadan di ipogawmo.”

³³ Dat kanan nan apo ken Moses en, “Kedeng nan ngadan nan nakabasol nan kaskasek isnan liblok.

³⁴ Ngem awnit omdan nan agew ay mangdosaak isnan naayda ay ipogaw gapo isnan basolda. Sik-a pay et omeyka kitdin ta ipangom nan naayda ay ipogaw isnan daga ay inbagak ken sik-a. Adim kalkalingkingan ay wada nan anghelko ay mangipangpango ken sik-a.”

³⁵ Dat ipaey nan apo nan sakit isnan kaipoipogaw ay dosada gapo tay pinilitda si Aaron ay mangsapo isdin balitok ay sinangbaka.