Exodo 28 - Kalin Apo Dios

Nan Badon Da Aaron 28:1-4 , 9-10 12 15-21 29-30 ; 31:18

¹ Dat itoloy nan apo ay mangwani ken Moses en, “Ayagam nan besatmo ay si Aaron ya nan an-akna ay da Nadab, Abihu, Eleazar ya si Ithamar. Pinilik daida isnan Israelita ta mensilsilbida ay padi ken sak-en.

² Dakat omset is badon di padi ay pala ken Aaron ay besatmo tapno gawigawis nan kail-ana ya maibagay ay padik.

³ Isonga ayagam am-in nan mendad-ait ay inagtak is laing ta ibagam ken daida en sapowenda nan badon Aaron. Et awnit maidaton siya ay padi ay mensilbi ken sak-en.

⁴ Ibagam ken daida ta omsetda is pektoral, efod, bado ya kagay ay naboldaan, bedbed ya balikes. Sapowenda nan naayda ay ganagwis ay badon di padi ay pala ken Aaron ay besatmo ya pala isnan an-akna tapno mensilsilbida ay padi ken sak-en.”

⁹ Danat itoloy ay mangibaga ken Moses en, “Omalaka is dowa ay nangina ay bato ay makwani en karnelia dakat isolat is dadi nan ngadngadan nan simpoo ya dowa ay an-ak din si Israel.

¹⁰ Isolatmo ay maiyoolnos isnan nakaiyanakanda nan ngadngadanda ay sag-en-em issan doway bato.

¹² Dakat ippey nan naayday bato isnan poken di efod ta mangipanemnem isnan simpoo ya dowa ay aap-on din si Israel. Isnan kaneg tona et baklayen Aaron nan ngadngadanda tapno sak-en ay apo et adiyak kalkalingkingan nan ipogawko.

¹⁵ Somapoka gedan is pektoral ay pala isnan pegaew ay osalen nan kangatowan ay padi isnan panggetkana isnan layden Apo Dios. Masapol ay masapo isnan paliso ay lopot di efod ya sin-iso nan boldana.

¹⁶ Nan bengbengetna et masapol ay menpapaliso nan kaandona ya nakopin ay naidobli. Sindangan nan kaan-andona ya sindangan gedan nan kaan-anawana.

^17-20 Dakat ippey isnan pektoral nan simpoo ya dowa ay nangina ay bato ay maiyoolnos is sagtotlo.

²¹ Isnan kada esa ay bato etmaisolat nan wasdin esa ay ngadan nan an-ak din si Israel ay mangipanemnemnem isnan aap-on din simpoo ya dowa ay aan-akna.

²⁹ Ta no songgep si Aaron isnan nadiosan ay kowalto et iyosalna nan pektoral ay naisolatan nan ngadngadan nan an-ak din si Israel tapno sak-en ay apo et awnitko nenemnemen nan ipogawko.

³⁰ Ippeymo nan urim ya nan tummim isnan pektoral tapno awiten Aaron daida no songgep isnan kad-ak. Et osalen Aaron ay kanayon nan naay pektoral tapno getkena nan laydek ay pala isnan Israelita.”