Exodo 24 - Kalin Apo Dios

Nan Nang-owenan Nan Israelita Isnan Bilbilin Apo Dios 24:1-8

¹ Dat kanan nan apo ken Moses en, “Omali kayo ken sak-en isnan bilig, dakayo ken da Aaron, Nadab, Abiu ya nan pitompoo ay aamam-an di Israelita ngem adi kayo omdaomdan isnan kad-ak dakayot menlokbob ay mangdayaw ken sak-en.

² Kedengka is somag-en ngem adi somagsag-en nan iib-am. Olay nan ipogaw et adida tomiktikid isnan naay bilig.”

³ Dat omey ibagan Moses isnan deeyday ipogaw nan am-in ay naibaga ya inbilin nan apo. Dat kanan am-in san deeyday ipogaw en, “Owen, ikkanmi am-in ay inbagan nan apo.”

⁴ Dat isolat Moses nan am-in ay bilin nan apo. Kawakgatana pay isnan wakgat dat somapo si Moses is altar ay maipaypay-an nan maited ken Apo Dios isnan gogowaben nan bilig danat batbaten nan simpoo ya dowa ay bato isnan bengetna ay mangipagtek ay simpoo ya dowa nan kap-owan din si Israel.

⁵ Danat ibaa nan bababallo et omeyda poowan am-in nan igasingda isnan apo ta mangipaila ay ited nan Israelita nan aw-awakda ay mangtongpal isnan laydena. Nin-idatonda pay is tap-in di baka ay pala isnan mangtatakdowan nan apo ken daida.

⁶ Issan nangpaltiyanda issan idatonda et inalan Moses nan gedwan di basan san napalti ay talaken et inippeyna isnan kapalapalanggana danapay iwaksi nan gedwana isnan ig-igid nan altar.

⁷ Danat alaen san naisolatan di bilin nan apo et ibibiyadna ay mangbasa ta dedengngen nan ipogaw. Dadat kanan en, “Patiyenmi nan apo et tongpalenmi am-in ay bilina.”

⁸ Daet alaen Moses san basa ay naippey issan palanggana et iwaksina isnan ipogaw. Danat kanan en, “Siya na nan basa ay mangipaila ay inowenanyo nan bilbilin nan apo ken dakayo.”

Nan Kasin Inmayan Moses Isnan Bilig Ay Sinai 24:12-18

¹² Dat kasin kanan nan apo ken Moses en, “Omalika ken sak-en isnan bilig et no wadaka isna daket idya ken sik-a nan dowa ay nadadampig ay bato ay nangisolatak isnan linteg ya bilbilin ay itdom isnan ipogaw.”

¹³ Dat mensagana da Moses ya nan kabadangna ay si Josue et tomikidda dat itoloy Moses isnan bilig ay kad-an Apo Dios.

¹⁴ Ngem esapay tomikid si Moses et kinwanina isnan aamam-a ay men-ipangpango en, “Sed-enyo dakami isna enggana ay somagong kami. Mataynan da Aaron ken Hur ken dakayo et no waday maaliglo et mabalin ay omey kayo ken daida.”

¹⁵ Daet tomikid si Moses issan bilig et malingban san bilig is liboo.

^16-17 Dat gomwab isnan bilig nan somili ay kawad-an nan apo. San pang-iilaan nan Israelita et kaneg menbidbidang ay apoy issan toktok di bilig et kinobotan di liboo san bilig is enem ay agew. Dat issan maikapito ay agew et inayagan nan apo si Moses issan liboo.

¹⁸ Dat songgep si Moses issan liboo et mentee isdi is epatpoo ay agew ya epatpoo ay labi.