Exodo 22 - Kalin Apo Dios

Nan Tap-in Di Bilin Apo Dios 22:21-27

²¹ Dat itoloy Apo Dios ay mangibagbaga isnan tap-in di bilina et kanana en, “Adiyo soksokilan wenno paligligaten nan sangaili. Nenemnemenyo ay dakayo et sangaili kayo gedan id Egipto.

²² Adiyo am-amisen nan balo ay babai wenno nan ngoso.

²³ Tay no am-amisenyo daida et awnitda men-adawag ay menpabadang ken sak-en et sak-en ay apo et dengngek daida.

²⁴ Daket makaliget et pateyek dakayo isnan gobat. Et awnit mabalowan nan as-awayo ay bababai ya nan an-akyo et awnit mangosowanda is ama.

²⁵ No paotangam is siping nan kompolni isnan ipogawko ay kodo et adiyo pabinisan ay kaneg nan menpap-aotang ay ngawi nan ogalina.

²⁶ No inalam nan abiton nan ib-am ay pangsobot is menbayadana et masapol ay isagongmo ken siya esapay maonog nan agew

²⁷ tay kedeng di is salapana isnan awakna ta pomopoos siya. Ngan pay iman di osalena ay maseyep? Tay no men-adawag ay menpabadang ken sak-en et dengngek siya tay managseg-angak.”