Exodo 20 - Kalin Apo Dios

Nan Simpoo Ay Bilin Apo Dios 20:1-17

¹ Nakwas pay di dat ninkali si Apo Dios ken daida et siya dana nan kinwanina.

² “Sak-en nan apo ay Diosyo ay nang-ikaan ken dakayo id Egipto ay nabab-aaanyo.

³ Adi kayo mendaydayaw is teken ay dios nodi sak-en et kedeng.

⁴ Adi kayo somapsapo is daydayawenyo is tinagtago wenno kompolni ay kankaneg nan wada isnan daya, nan batawa, wenno isnan danom ay wada isnan daem nan lota.

⁵ Adi kayo mendaydayaw wenno mensilsilbi isnan kompolni ay aped sinapsapon di ipogaw tay sak-en nan apo ay Diosyo et adiyak kayten ay waday maiyis-iso ken sak-en. Et isnan mang-adi ken sak-en et dosaek daida ya nan an-akda enggana isnan maikatlo ya maikap-at ay ap-oda.

⁶ Ngem ipailak nan layadko isnan manglayad ken sak-en ya mangtongpal isnan bilinko enggana isnan kalibolibo ay aap-oda is kasin.

⁷ Adiyo os-osalen nan ngadanko isnan ngawi ay banag tay sak-en ay apo ay Diosyo nan mangdosa isnan olay sino ay aped mang-os-osal isnan ngadanko.

⁸ Adiyo kalkalingkingan ay mangtongpal isnan bilin isnan agew ay omillengan tay napateg nan agew ay deey isnan apo.

⁹ Tay nan enem ay agew et omanay is mang-ikkananyo isnan oblayo.

¹⁰ Ngem men-illeng kayo isnan maikapito ay agew tay siya nan agew ay pala ken sak-en ay apo ay Diosyo. Isnan deey ay agew et adi kayo polos men-obla ay olay nan an-akyo, nan baayo, nan talakenyo wenno nan sangaili ay wada isnan teanyo.

¹¹ Tay sak-en ay apo et sinapok nan daya, nan batawa, nan baybay ya nan am-in ay nawada isnan enem ay agew ngem isnan maikapito ay agew et nin-illengak. Isonga sak-en ay apo et binindisyonak san deey ay agew di illeng daket ninbalinen ay napateg ay agew ay pala ken sak-en.

¹² Tongpalenyo da amayo ken inayo tapno mabaybayag nan matagowanyo isnan daga ay idyak ken dakayo.

¹³ Adi kayo menpatpatey.

¹⁴ Adi kayo makikamkamolala.

¹⁵ Adi kayo men-ak-akew.

¹⁶ Adi kayo menpabpabasol isnan ib-ayo.

¹⁷ Adiyo ap-apalan nan baey nan ib-ayo, nan asawana, nan baana, nan bakana, nan kabayona wenno kompolni ay kokwana.”

Nan Inmegyatan Nan Israelita 20:18-21

¹⁸ Issan nangdengngan san deeyday ipogaw issan kido ya tanggoyob dadapay ilaen san kimat ya men-as-asok ay bilig dadat pomayegpeg isnan egyatda dadapay omad-addawi issan bilig.

¹⁹ Dadat kanan ken Moses en, “Dengngenmi no sik-a nan menkali ngem no si Apo Dios nan makikali ken dakami et waay matey kami is egyatmi.”

²⁰ Dat kanan Moses en, “Adi kayo omegyat tay inmali si Apo Dios ay mang-ila et kedeng no tet-ewa ay patiyenyo siya ya tapno itoltoloyyo ay mangtongtongpal ken siya ta adi kayo bomasbasol.”

²¹ Ngem dat kayet itatakdeg nan deeyday ipogaw isnan ad-addawi dapay somag-en si Moses issan menbolilinget ay liboo ay kad-an Apo Dios.