Exodo 19 - Kalin Apo Dios

Nan Israelita Isnan Bilig Ay Sinai 19:1-15

^1-2 Dat komaan nan Israelita id Refidim et isnan omona ay agew isnan maikatlo ay bowan enggana isdin kinmaananda id Egipto et omdanda isnan pondag ay mangliliwes isnan bilig ay Sinai et isdi nan inmap-apaanda.

³ Dat tomikid si Moses isnan bilig ay makikali ken Apo Dios. Dat kanan nan apo ay wada isnan toktok di bilig ken Moses en, “Siya na nan ibagam isnan Israelita ay aap-on din si Jacob.

⁴ ‘Inilayo nan inikkak isnan iyEgipto ya nan inikkak ay nangiyali ken dakayo isna ay kaneg nan ikkan di manok isnan piyekna.

⁵ Et no patiyenyo sak-en ya tongpalenyo nan inkalik et awnit dakayo nan ipogawko. Kowak nan batawa ngem dakayo nan napili ay ipogawko.

⁶ Isonga sak-en et kedeng nan Diosyo ay daydayawenyo dakayot mensilbi ken sak-en ay kaneg nan ikkan di padi.’ Siya di nan ibagam isnan Israelita.”

⁷ Dat bomaba si Moses danat paayagan am-in nan aamam-an di Israelita ta ibagana ken daida nan am-in ay inbilin nan apo ken siya.

⁸ Dat kanan nan deeyday ipogaw en, “Owen, tongpalenmi am-in ay inbagan nan apo.” Dat omey si Moses et ipagtekna isnan apo nan kinwanida.

⁹ Dat kanan nan apo ken Moses en, “Awnitak omali ken sik-a ay maitatapi isnan menselelede ay liboo tapno dengngen nan ipogaw nan makikalkaliyak ken sik-a dadat patiyen sik-a koma ay eng-enggana.” Et inbagan Moses isnan apo nan kinwanin nan kaipoipogaw.

¹⁰ Dat kanan nan apo ken siya en, “Omeyka isnan ipogaw ta ibagam ken daida en dalosanda nan aw-awakda id wani ya is wakgat esadapay mangdayaw. Masapol pay ay labaanda nan badbadoda.

¹¹ Dadat mensagana is katlona tay isnan deey ay agew et awnitak gomowab isnan bilig ay Sinai tapno ilaen am-in nan ipogaw sak-en.

¹² Pay-am is pengpeng nan liliwesen di bilig ta adi makagdang nan kaipoipogaw dakat ibaga ken daida ta adida tomiktikid wenno somagsag-en isnan bilig tay no waday somag-en et mapatey.

¹³ Magayang wenno mapanaan nan ipogaw ay gomdang isnan pengpeng tay masapol ay adiyo sagsag-enen nan epdas ginomdang. Maikkan na isnan ipogaw wenno talaken tay masapol ay mapatey nan omey isnan bilig. Ngem no naipakali nan tanggoyob dat somag-enet nan deeyda ay ipogaw isnan bilig.”

¹⁴ Dat gomowab si Moses issan bilig et omeyna ibaga isnan kaipoipogaw ta mensaganada isnan mendayawanda isonga ninlabada isnan badbadoda.

¹⁵ Dat kanan Moses ken daida en, “Masapol ay is katlona et nakasagana kayo et ya adiyo on-ona id-idlen nan as-awayo.”

Nan Ginomwaban Nan apo Isnan Bilig Ay Sinai 19:16-25

¹⁶ Dat isnan wakgat pay isnan maikatlo ay agew dat menkido dapay menkimat issan bilig ya wada pay nan menselelede ay liboo dat dengngen nan kaipoipogaw nan napinapigsa ay tanggoyob dadat pomayegpeg isnan egyatda.

¹⁷ Dat ipangon Moses san deeyday ipogaw et omeyda isnan kad-an Apo Dios et itakdegda issan gogowaben san bilig.

¹⁸ San bilig ay Sinai et malilingban isnan asok tay linmayog nan apo ay naitatapi isnan apoy isnan toktok nan deey ay bilig dat menpangato nan asok ay kaneg nan asok di mapop-oowan ay bilig. Et pilmi ay menpaypayegpeg nan deeyday ipogaw gapo isnan egyatda.

¹⁹ Dat pomigpigsa nan kalin nan tanggoyob dapay menkali si Moses et songbatan Apo Dios isnan kaneg kapigsan di kido nan ngengena.

²⁰ Dat lomayog nan apo isnan toktok nan deey ay bilig ay Sinai et patikidena si Moses.

²¹ Dat kanan nan apo ken Moses en, “Lomayogka ta ibagam isnan deeyday ipogaw ta adida gomgomdang isnan pengpeng ay omali mang-ila ken sak-en tay no ikkanda et adoado nan matey ken daida.

²² Olay nan papadi ay somag-en ken sak-en et masapol ay isaganada omon-ona nan aw-awakda tay no adida isagana esadapay somag-en et dosaek daida.”

²³ Dat kanan Moses isnan apo en, “Adi makatikid nan ipogaw tay inbilinmo ken dakami en masapol ay pay-anmi is pengpeng nan liliwesen nan bilig ay menpap-ailaam.”

²⁴ Dat kanan nan apo ken siya en, “Gomowabka ngalod ta enka ayagan si Aaron ngem makailam ta adi gomgomdang nan ipogaw ya nan papadi isnan pengpeng ta adida madosa.”

²⁵ Dat lomayog si Moses et omey issan kad-an san deeyday ipogaw et ibagana ken daida nan kinwanin nan apo.