Exodo 17 - Kalin Apo Dios

Nan Naipabalaan Nan Danom Isnan Bato 17:1-7

¹ Nakwas pay di dat komaan nan Israelita isnan pondag ay Sin et nin-at-at-atonda isnan nateketekan ay logal tay siya nan bilin nan apo. Ninkampoda id Refidim ngem maid mainom is danom isdi.

² Ninlilida kasin ken Moses et kananda en, “Agtam adi dakami is inomenmi.” Dat kanan Moses en, “Aytay dakayon malalanili? Dayon padpadasen nan apo?”

³ Ngem dadama ay naewew nan ipogaw isdi isonga motmotmotanda kayet si Moses ay mangmangwani en, “Dakan od inbala dakami id Egipto? Ay tapno pateyem dakami ya nan an-akmi ya talakenmi is ewew?”

⁴ Dat ipapasnek Moses ay menlowalo isnan apo et kanana en, “Ay ngan pay di ikkak isnan naayda ay ipogaw? Naligatda ay maisolowan. Ngannganida pay gomayang ay mangpatey.”

⁵ Dat kanan nan apo ken Moses en, “Ayagam nan tap-in di aamam-an nan Israelita ta on-onaanyo nan sanada ay ipogaw. Ikawitmo san sokodmo ay inyosalmo issan ginawang ay Nile.

⁶ Awnitak tomakdeg isnan sagangmo isnan bato isnan bilig ay Sinai dakat isaplit nan sokodmo isnan bato et awnit kabanala nan danom ay inomen nan sanada ay ipogaw.” Dat ikkan tet-ewa Moses na ay iilaen nan aamam-an nan Israelita.

⁷ Danat ngadnan san deey ay logal is Massa ya Meriba tay ninlili ya pinadpadas nan Israelita nan apo issan ninsootanda en, “Ay wada nan apo ken datako wenno maid?”

Men-gobat Nan Israelita Isnan Amelikita 17:8-16

⁸ Issan kad-an pay laeng di Israelita id Refidim et inmey nan Amelikita et gobatenda daida.

⁹ Dat kanan Moses ken Josue ay esay nangbadbadang ken siya en, “Pomilika isnan lalalaki is men-ib-am ta omeyyo gobaten nan Amelikita is wakgat. Sak-en pay et esak tomakdeg isnan toktok nan bilig ay manggegeen isnan sokodko ay inbagan Apo Dios en ikawitko.”

¹⁰ Dat ikkan Josue nan inbagan Moses en ikkana et inmeyda ay nanggobat isnan Amelikita dapay tomikid da Moses, Aaron yas Hur issan toktok di bilig.

¹¹ Et no basta ingangaton Moses nan ledengna et mangabak nan Israelita ngem no ibabana nan ledengna dat ilogin nan Amelikita ay mangabak.

¹² Idi nabannog si Moses ay mangingangato isnan ledengna dat omala da Aaron ken Hur is bato ta tomokdowan Moses dadapay itakdeg isnan mensinombangil ay sikigana ta badanganda ay mang-ingangato isnan ledengna enggana ay linomnek nan agew.

¹³ Et inabak da Josue nan Amelikita.

¹⁴ Dat kanan nan apo ken Moses en, “Isolatmo nan naay ay inommat ta waday manemnemnemana. Ibagam ken Josue en awnitko dosaen nan Amelikita ta maid mabaybay-an.”

¹⁵ Dat somapo si Moses is altar ay men-idatonana ta men-iyamanana ken Apo Dios. Nginadnana di is “Nan apo Nan Mangbadbadang Isnan Mangab-abakak.”

¹⁶ Dat isapatan Moses isnan deey ay altar ay mangwani en, “Nan apo et awnitna itoloy ay manggobat isnan Amelikita ay eng-enggana.”