Exodo 16 - Kalin Apo Dios

Nan Mana Ya Nan Kasabasabag 16:1-35

¹ Dat menlobwat nan Israelita ay nagapo id Elim et engganay inomdanda isnan pondag ay makwani en Sin ay ninbaetan nan Elim ya Sinai isdin maikasimpoo et lima ay agew isnan maikadwa ay bowan ay epdasda kinmaanan id Egipto.

² Dat isnan deey ay pondag et ninlilida kasin ken da Moses ken Aaron

³ ay mangwani ken daida en, “Pinatey koma laengen nan apo dakami isdin kawad-anmi id Egipto. Tay isdi et mabalin dadlo ay mensida kami is kalni ya mabalin ay mangan kami is kompolmi ay makan ay kaytenmi enggana ay maoma kami. Ngem inpaalim dakami isnan naay ay pondag ta matey kami is owatmi.”

⁴ Dat kanan nan apo ken Moses en, “Id wani ngalod et itedko nan makan ay magapo id daya ay pala ken dakayo am-in. Dat masapol ay inagew ay bomala nan ipogaw ay menpidit is ostoosto ay kanenda isnan deey ay agew. Et siya na nan manggetkak ay tongpalenda nan bilinko.

⁵ Dat isnan maikan-em ay agew et masapol ay mendobli nan kaad-adon nan olnongenda issan sigod ay insaganada.”

⁶ Isonga dat kanan da Moses ken Aaron isnan Israelita en, “Id wani ay masdem et siya nan mangtekanyo ay nan apo nan nangikaan ken dakayo id Egipto.

⁷ Is wakgat et mailayo nan somili ay kawad-an nan apo. Dinngena nan liliyo ken siya. Owen, siya nan ninliliyanyo tay aped kami mabab-aa et kedeng ay mangibagbaga isnan bilina.”

⁸ Dat itoloy Moses ay mangwani en, “Isnan masdem et nan apo nan mang-idya isnan kalni ay isdayo danat agtan gedan dakayo isnan wakgat is makan enggana ay mapnek kayo tay dinngena nan dadama ay menlilliliyanyo. Tay no menlili kayo ken dakami et baken kami is menlilliliyanyo nodi isnan apo.”

⁹ Dat kanan Moses ken Aaron en, “Ibagam isnan sanaday ipogaw ta somag-enda isnan kawad-an nan apo tay dinngena nan motmotda.”

¹⁰ Idi kakalkalin Aaron san deeyday ipogaw dat nin-ilada isnan liboo ay nagapo isnan pondag nan pilmi ay somili ay kawad-an nan apo.

¹¹ Dat kanan nan apo ken Moses en,

¹² “Dinngek nan lilin nan Israelita. Ibagam ken daida ay isnan masdem et awnit wada nan kalni ay isdada dat isnan wakgat et wada abes nan makan ay kanenda enggana ay mapnekda. Et awnit siya na nan manggetkanda ay sak-en nan apo ay Diosda.”

¹³ Dat tet-ewa issan masdem et adoado nan sabag ay masidadateng et engganay adi kaila nan lota isnan kad-an san Israelita. Dat isnan wakgatna et adoado abes nan monglo.

¹⁴ Idi naango san monglo dat wadada isnan lota nan kaneg dalalo ay menpolaw nan ilana ay naiwawakat.

¹⁵ Idi inilan nan Israelita dadat men-asisoot en, “Ay ngan datona?” tay adida getken. Dat kanan Moses ken daida en, “Siya na nan makan ay inted nan apo ay kanenyo.

¹⁶ Inbilin nan apo ay nan wasdin esa ken dakayo et men-olnong is ostoosto ay kanena. Masapol ay agan-anay ay epat ay sopa isnan kada esa ay ipogaw isnan sinbaey.”

¹⁷ Et siya na nan inikkan san Israelita. Wadada nan nin-olnong is ad-ado ya wadada abes nan nin-olnong is at-atik.

¹⁸ Idi sokatenda san inalada dat maid solok san nin-ala is ad-ado ya egay abes kinmolang san nin-ala is at-atik. Nan wasdin inolnong nan esa ken daida et ostoosto isnan masapolna.

¹⁹ Dat kanan Moses ken daida en, “Adi kabalin ay men-idolin kayo is pala is wakgat.”

²⁰ Ngem wadada nan egay nangidnge ken Moses et nin-ibay-anda kayet is pala isnan kawakgatana. Kawakgatana pay daet nabogis ya nabanges san inbay-anda et gapo is dana dat makaliget si Moses ken daida.

²¹ Et winakgat ay nin-ol-olnongda is ostoosto ay kanenda isnan agew ay deey. Daet no makagkag-aw ay pomigsa nan agew dat malonag nan binay-anda isnan lota.

²² Isnan maikan-em ay agew et nin-olnongda is doblin san kaad-adon san makan et wao ay sopa isnan tonggal esay ipogaw. Dat omey am-in nan aap-apon di Israelita et enda ibaga ken Moses.

²³ Dat kanan Moses en, “Inbilin nan apo en obaya is wakgat et omilleng tako isnan obla tako tay nan agew ay naay et pala ken siya. Id wani otowenyo nan kaytenyo ay kaad-adon di otowenyo et nan mabay-an dakayot idolin pala is wakgat.”

²⁴ Inikkanda nan inbilin Moses et indolinda tet-ewa nan nabay-an ay pala isnan kawakgatana. Isnan kawakgatana et egay kagege wenno nadadael san indolinda.

²⁵ Dat kanan Moses en, “Nan sanada et kanenyo pala id wani ay agew tay id wani nan agew ay men-illengan tako ya siya nan agew ay pala isnan apo et maid maala is makan.

²⁶ Isnan enem ay agew et masapol ay men-olnong kayo is makan ngem isnan maikapito et agew di illeng isonga maid makan is alaenyo.”

²⁷ Ngem isnan maikapito ay agew et wadada kayet nan inmey ay omala koma is makan ngem maid maala.

²⁸ Dat kanan nan apo ken Moses en, “Ay tongona pay di mangpatiyanyo isnan bilbilinko?

²⁹ Nenemnemenyo ay sak-en ay apo nan nang-idya isnan agew ay men-illenganyo isonga isnan maikan-em ay agew et agtak dakayo is kanenyo ay pala doway agew. Isnan maikapito ay agew et wasdin di mentetee isnan baeyna ay adida komak-aan.”

³⁰ Et omillengda isnan maikapito ay agew.

³¹ Nan pangwanin nan Israelita issan deey ay makan et mana. Nan ilan nan mana et menpolaw ay kaneg bokel ay esek ya nan tamtamna et mensam-it ay kaneg dilo.

³² Dat kanan Moses en, “Inbilin nan apo ay omidolin tako is tap-in di mana ta waday esa pangil-ilaan di aap-o tako is kasin isnan makan ay inid-idyan nan apo ken datako isnan pondag isdin nangikaanana ken datako id Egipto.”

³³ Dat kanan Moses ken Aaron en, “Omalaka is banga ta pay-am is epat ay sopa ay mana dakat ippey isnan kadaydayawan nan apo ta maidolin ta waday esa pangil-ilaan di ap-o tako is kasin.”

³⁴ Et kaneg nan inbagan nan apo ken Moses et inippey tet-ewa Aaron san banga isnan sagang nan baol ay awnit maipay-an san dowa ay nadadampig ay bato ay naisolatan nan linteg Apo Dios ta pangil-ilaan nan aap-oda isdin kinkinanda.

³⁵ Mana nan kinkinan di Israelita isnan epatpoo ay tew-en enggana ay inomdanda isnan ili ay Canaan ay ninteanda.