Exodo 15 - Kalin Apo Dios

¹ Daet menday-eng da Moses ya nan Israelita et iday-engda nan naay kanta isnan apo. “Ikantaak nan apo tay nangabak is nadayaw ay panangabak. Linimona isnan baybay nan kakabakabayo ya nan mangitoltolong isnan logan.

² Nan apo nan napigsa ay mangsalsalaknib ken sak-en. Siya nan nangisalakan ken sak-en. Siya nan Diosko ay daydayawek. Siya nan Dios din alal-apok isonga iday-engko nan kinangatona.”

²⁰ Nakwas pay di dat alaen Miriam ay mamadto ay babai ay besat da Aaron nan makwani en tamborin dat tadonen nan am-in ay bababai ay mang-ay-ayam isnan tamborinda dadapay mensalsala.

²¹ Dat ikantaan Miriam daida et kanana en, “Menkanta tako ken apo tay nangabak is nadayaw ay panangabak. Intep-ana isnan baybay nan kabayoda ya nan ninlologan.”

Nan Menpait Ay Danom 15:22-27

²² Dat ipangon Moses nan Israelita et taynanda nan Gadangdang ay Baybay et omeyda isnan pondag ay Sur. Nindaddad-aanda isnan pondag is tolo ay agew dapay maid dinas-anda is danom.

²³ Inomdanda isnan esay logal ay makwani en Mara ngem nan danom isdi et menpait ay adi kainom. Siya nan gapona ay nangadnan nan deey logal is Mara.

²⁴ Dat menlili nan ipogaw ken Moses et kananda en, “Ay ngan pay di inomen tako?”

²⁵ Dat ipapasnek Moses ay menlowalo. Dat ipailan nan apo ken siya nan esay kaiw dat itep-an Moses issan danom et mabalin dadlo ay mainom. Et id isdi nan nang-idyaan nan apo isnan linteg ya isdi nan nangpadasana ken daida.

²⁶ Kinwanina ken daida en, “No tet-ewa ay tongpalenyo sak-en ta ikkanyo nan kanak en osto ya ikkanyo nan bilbilinko et adiyak dosdosaen dakayo isnan sakit ay inpalak-amko isnan iyEgipto tay sak-en nan apo ay makaagas ken dakayo.”

²⁷ Intoloyda ay mendaan et omdanda id Elim ay kad-an di simpoo et dowa ay balaan ya pitompoo ay kaiw ay kaneg niyog. Et inmap-apada isdi isnan sag-en di danom.