Exodo 14 - Kalin Apo Dios

Nan Nanggedanganda Isnan Baybay Ay Makwani En Gadangdang 14:1—15:2, 20-21

¹ Dat kanan nan apo ken Moses en,

² “Ibagam isnan sanada ay Israelita ta somagongda id Pihahirot ay nin-gawaen nan Migdol ya nan baybay ay makwani en Gadangdang isnan sag-en di Baal Zefon ta menkampoda isnan sagang nan deey ay ili.

³ Et awnit kanan san alin nan Egipto en waay naliweng nan Israelita et mapokokda isnan pondag.

⁴ Awnitko pakedseen nan nemnem san ali et onodenda kayet dakayo. Et awnitak maidaydayaw isnan mang-abakak ken daida ay iyEgipto ya nan sosoldadoda. Awnit siya nan mangtekan nan iyEgipto ay sak-en nan apo.” Et pinatin nan Israelita nan naibaga ken daida.

⁵ Idi gintek nan alin di Egipto en kinmaan et nan Israelita dat matken nan nemnemna ya nan iib-ana dadat kanan en, “Ay ngan pay nan inikkan tako ay naay? Aped tako inpalobos nan Israelita ay komaan et dey maid et bab-aaen tako.”

⁶ Dat ipasaganan san ali nan kaneg kalisa ay logana ay makigobat ya nan sosoldadona.

⁷ Inpasaganana pay am-in nan logan ay makigobat ay naitapi nan enem gasot ay kagagawisan ay logan ay menloganan nan aap-apon di sosoldadona.

⁸ Dat pakedseen nan apo nan nemnem san ali et omeyda kamakamen ay mang-onod issan Israelita ay dadama nan gasingda ay siwawaya issan kinmaananda.

⁹ Inonod nan sosoldadon di iyEgipto, nan ali, nan am-in ay kabayo, nan logan ya nan mangitoltolong isnan loganda nan Israelita. Et dinas-anda daida isnan inmapaanda ay benget nan baybay ay makwani en Gadangdang isnan sag-en nan Pihahirot ya Baal Zefon.

¹⁰ Idi nailan nan Israelita ay kedkedagen san ali ya nan sosoldadona daida et inmegyaegyatda dadat menlowalo isnan apo ta badangana daida.

¹¹ Kinwanida ken Moses en, “Ay gapo tay maid maikaobanmi id Egipto isonga inpaalim dakami id isna ay matey? Ilaem pod nan ommat isnan nangikaanam ken dakami id Egipto.

¹² Tay isdin datakot komaan et kinwanimi en awnit ommat na ya kinwanimi gedan en bay-am laengen dakami ay mabab-aa ken daida. Gag-awis pay ay olay baa kami mo nan matey kami isnan pondag.”

¹³ Dat kanan Moses ken daida en, “Adi kayo omegyat, papipigsaenyo nan nemnemyo et id wani ay agew awnit mailayo nan ikkan nan apo ay mangisalakan ken dakayo. Awnit adiyo et mail-ila kasin nan naayda ay iyEgipto.

¹⁴ Nan apo nan makigobat pala ken dakayo et maid ikkanyo nodi basta ikikin-eyo.”

¹⁵ Dat kanan nan apo ken Moses en, “Adi masapol ay dawatenyo nan badangko. Ibagam kitdin isnan sanada ay Israelita ta itoloyda ay mendaan.

¹⁶ Idokyawmo nan sokodmo isnan baybay ta magedwa nan danom ta nan gedangen nan Israelita et naimaggan ay lota

¹⁷ ya pakedseek kayet nan nemnem nan naayda ay iyEgipto ta kedagenda kayet dakayo et awnit maidaydayawak isnan mang-abakak isnan ali, nan sosoldadona, nan loganda ya nan mangitoltolong isnan loganda.

¹⁸ Isnan mang-abakak ken daida et awnit getkenda et ay sak-en nan apo.”

¹⁹ Dat men-aton nan anghel Apo Dios ay wada isnan napoponok ay liboo ay mangipangpango isnan Israelita et omey isnan dodokoganda.

²⁰ Nintee san liboo isnan gagawa-en nan iyEgipto ya nan Israelita. Pinabolinget san liboo nan kad-an san iyEgipto dapay pomapat-a nan kad-an san Israelita isonga sinlabiyan ay egay polos nakasag-en nan iyEgipto isnan Israelita.

²¹ Dat oyaden Moses nan ledengna isnan kad-an di baybay daet ipadagem nan apo nan napigsa ay dagem ay nagapo isnan balaan di agew et mensiyanena nan danom. Sinlabiyan ay nindagem et naango nan gawan nan baybay tay nasiyan nan danom et nakadwa.

²² Dat mendaan san Israelita issan naaango ay lota tay ninbalin ay kaneg diding san danom isnan mensinombangil.

²³ Dat kayet onoden nan iyEgipto daida issan baybay pati nan am-in ay kabayon san ali, nan loganda ya nan mangitoltolong isnan logan.

²⁴ Issan toman-o et iilaen nan apo ay wada issan napoponok ay apoy ya liboo san iyEgipto danat paegyaten daida.

²⁵ Isonga nan inikkana et inbanekna nan landok ay pilid nan loganda ta adida makadaan. Dat kanan nan iyEgipto en, “Nan apo nan makigobgobat pala isnan Israelita. Komaan tako et isna.”

²⁶ Dat kanan nan apo ken Moses en, “Kasinmo oyaden nan ledengmo isnan baybay ta somagong nan danom et malimon nan iyEgipto, nan loganda ya nan mangitoltolong isnan logan.”

²⁷ Inoyad kasin Moses nan ledengna isnan baybay et ostoy pomat-a dat somagong san danom issan sigod ay ikakana. Pinadas nan iyEgipto ay somagong ngem dat ilin-eb nan apo daida.

²⁸ Linimon san sinmagong ay danom san loganda, san mangitoltolong isnan logan ya am-in ay soldadoda ay nang-onod isnan Israelita isnan baybay. Maid olay esa ken daida is nabay-an.

²⁹ Ngem nan nindaanan san Israelita et naimaggan ay lota tay ninbalin ay kaneg diding san danom issan mensinombangil.

³⁰ Et issan agew ay deey et insalakan nan apo nan Israelita isnan iyEgipto et inilan nan Israelita nan natey ay aw-awak san iyEgipto ay tinmappak isnan benget di baybay.

³¹ Inmegyat ya nasdaaw san Israelita isnan inilada ay panakabalin nan apo isnan nang-abakana issan iyEgipto dadaet mamati isnan apo ya ken Moses ay baana.