Exodo 12 - Kalin Apo Dios

Nan Ninlogiyan Nan Fiestan Di Linmaosan Di Anghel 12:1-14

¹ Epdas nakikali nan apo ken da Moses ken Aaron id Egipto et kinwanina en,

² “Nan naay ay bowan et ken dakayo awnit siya nan damon di bowan ay mangnemnemanyo isnan mangsilsilbiyanyo ken sak-en isnan tinew-en.

³ Ibagayo na isnan am-in ay Israelita ta isnan maikasimpoo ay agew nan naay bowan et omala nan wasdin am-an nan sinbaey is anak di kalnilo wenno anak di kalding pala ken daida ay sinbaey.

⁴ Ngem no at-atik nan esay sinbaey ya adida makaisda isnan esay kalnilo wenno kalding et mabalin ay mentiponda isnan kaasag-enan ay sagogongda ta omalada is esay maibagay isnan kaad-adoda ya isnan osto ay maisdada.

⁵ Masapol ay nan piliyenyo et maid polos kadilawana ya masapol ay lalaki ay kalnilo wenno kalding ay esa nan tew-ena.

⁶ Et isnan masdem nan maikasimpoo ya epat ay agew nan bowan ay naay dat mapalti nan wasdinda inala ay kalnilo wenno kalding.

⁷ Dadat omala isnan basa et imalkada isnan mensinombangil ya isnan ngangatowen nan segpan nan bab-aey ay mangisdaanda.

⁸ Isnan labina et dawkisenda san kalni esadapay isda dadapay panganan is menpait ay madengdeng ya tinapay ay egay kabobodan.

⁹ Adida is-isda nan egay kaoto wenno nan naagas. Masapol ay adi katadtadtad ay maidawis. Adida gedan kak-aanen nan olo, nan siki ya nan dinaemna.

¹⁰ Masapol ay adi kayo men-ibaybay-an is pala isnan kawakgatana. No waday nabay-an et masapol ay mapoowan.

¹¹ Et masapol ay ikakamoyo ay mang-isda ay nakasagana kayo ay menbaat ya nakasapatos kayo ya gegen-anyo et nan sokodyo. Siya na nan awnityo ikkan isnan Fiestan di Linmaosan di Anghel ay mangnemnemanyo ken sak-en ay apo.

¹² Isnan labin todi et awnitak omey ay mangsolsol isnan am-in ay ilin nan Egipto et pateyek am-in ay iyon-a ay lalaki ay anak ay ipogaw wenno talaken dakpay dadaelen am-in ay didiosen nan Egipto. Sak-en nan apo.

¹³ Nan basa isnan segpan et siya nan awnit malkan nan bab-aey ay menteteanyo. No ilaek nan basa et awnitko laosan dakayo ta maid om-ommat ken dakayo no dosaek nan iyEgipto.

¹⁴ Et masapol ay nan naay agew et siya nan esa ay napateg ay agew ken dakayo ta mangnemnemanyo ken sak-en ay apo ya isnan inikkak. Dakayot itoltoloyto ay mang-ik-ikkan is dana ay eng-enggana.”

Nan Fiestan Di Tinapay Ay Egay Kabobodan 12:15-17 , 21-28

¹⁵ Kinwanin nan apo en, “Isnan pito ay agew et masapol ay adi kayo mangmangan is tinapay ay nabobodan. Nan kanenyo et kedeng et nan tinapay ay egay kabobodan. Isnan omona ay agew et masapol ay kaanenyo am-in nan bobod isnan bab-aeyyo. Tay no waday mangan is tinapay ay nabobodan isnan naay pito ay agew et adiyet maibilang ay ipogawko.

¹⁶ Et isnan omona ya isnan maikapito ay agew et madagop kayo ay mendayaw ken sak-en. Isnan deeyday agew et masapol ay adi kayo men-ob-obla ngem mabalin ay otowenyo nan kanenyo.

¹⁷ Nenemnemenyo nan agew ay nangikaanak ken dakayo id Egipto ta iyob-obayayo. Et tinew-en isnan tonggal kaneg tona ay agew et lagsakanyo ta men-iyaman kayo ken sak-en ay apo.”

²¹ Dat dagopen Moses am-in ay aamam-an di Israelita et kanana ken daida en, “Wasdin kayo pomili is anak di kalnilo wenno anak di kalding ta paltiyenyo ta menlagsakan nan pamilyayo isnan naay Fiestan di Linmaosan di Anghel.

²² Omala kayo is sinpenge ay sangan di mola ay makwani en hisop dakayot isawsaw isnan palanggana ay naipay-an di basa dayot iwaksi isnan mensinombangil ya ngangatowen di segpan nan baeyyo. Dakayot mentetee isnan baeyyo ay maid bomalbala is olay esa ken dakayo enggana ay mawakgat

²³ tay omey nan apo ay mangsolsol isnan Egipto ay mangpatey isnan iyon-a ay an-ak di iyEgipto et no ilaena nan basa isnan mensinombangil ya ngangatowen di segpanyo danat laosan. Adina ipalobos ay songgep nan anghel ay menpatpatey isnan baeyyo ay mangpatey isnan iyon-a ay an-akyo.

²⁴ Masapol ay patiyenyo ya nan an-akyo nan naayda ay bilin ay eng-enggana.

²⁵ No omdan kayo isnan ili ay inkalin nan apo ay idyana ken dakayo et masapol ay ikkanyo nan naay ay bilin.

²⁶ Dat no sooten nan an-akyo no ngan nan kayat ay ibagan nan naay ik-ikkanyo

²⁷ dayot kanan ken daida en, ‘Siya na nan ikkan tako isnan Fiestan di Linmaosan di Anghel ay mangdayawan tako isnan apo tay linaosana nan bab-aey tako ay Israelita id Egipto. Ninpatey isnan iyEgipto ngem egayna intapi datako ay Israelita.’ ” Nakwas pay ay dinngen nan Israelita am-in nan inbagan nan apo dadat menpalintomeng et mendayawda.

²⁸ Dadat omey ikkan nan bilin ay inbagan nan apo ken da Moses ken Aaron.

Nan Nateyan Nan Iyon-a Ay An-ak Di iyEgipto 12:29-36

²⁹ Isnan tengan nan labi et pinatey nan apo nan am-in ay iyon-a ay lalalaki ay an-ak di iyEgipto ay menlogi isnan iyon-a ay anak di ali ay awnit mangtawid koma isnan kinaalin amana enggana isnan iyon-a ay anak di balod. Natey gedan am-in nan damo ay an-ak di talakenda.

³⁰ Isnan deey ay labi et nagido dat bomangon san ali ya siyangna gedan isnan am-in ay iib-ana ya nan am-in ay iyEgipto. Wada nan men-oowakis ay men-ag-aga isnan tonggal baey di iyEgipto tay wada nan natey isnan tonggal baeyda.

³¹ Issan deey met laeng ay labi et pinaayagan san ali da Moses ken Aaron danat kanan ken daida en, “Komaan kayo ya nan iib-ayo ay Israelita isnan naay ay ilik. Enkayo mendayaw isnan apo ay din kinwaniyo.

³² Alaenyo nan kalniloyo, nan kaldingyo ya bakayo ta komaan kayo et. Dayot ilowalowan abes sak-en.”

³³ Dat ipapatin nan iyEgipto ta ikakamon nan Israelita ay komaan isnan ilida tay kananda en, “Awnit matey kami am-in no adi kayo komaan.”

³⁴ Isonga daet alaen nan Israelita nan tinapay ay egay kabobodan ay egay pay laeng kaoto et ippeyda isnan pag-ot-otowan di tinapay et bongonenda isnan loplopotda sadapay isadley.

³⁵ Pinatin nan Israelita san inbagan Moses et ninkedawda isnan iyEgipto is palata ya balitok ay al-alkos di awak ya nan badbadoda.

³⁶ Inpapangaton nan apo nan Israelita isnan nemnem di iyEgipto et pinatida daida. Inidyada nan dinawdawat nan Israelita et siya na nan inkakanda ay nangikaan isnan kokwan di iyEgipto.

Nan Kinmaanan Nan Israelita Id Egipto 12:37-42

³⁷ Dat menlobwat nan Israelita ay komaan id Egipto et mendad-aanda menlogi id Rameses ay sakop di Gosen et menpaeyda id Succot. Waay enem gasot ay libo ay lalaki nan kabibilangda ay egay naibilang nan bababai ya nan oongong-a.

³⁸ Ado pay ay baken Israelita nan nakkey ken daida ya naitapi gedan nan ado ay kalnilo, kalding ya bakbaka.

³⁹ Idi inomdanda id Succot dadat otowen nan tinapay ay egay kabobodan ay in-gapoda id Egipto. Maid bobodna tay bigla nan nangpakaananda ken daida id Egipto isonga maid wayada ay nangisagana is tinapay ay nabobodan.

⁴⁰ Epat gasot ya tolompoo ay tew-en nan ninteean nan Israelita id Egipto.

⁴¹ Nakwas pay nan epat gasot ya tolompoo ay tew-en dat komaan am-in nan ipogaw nan apo id Egipto.

⁴² Din deey ay labi et binanbantayan nan apo daida isnan nangikaanana ken daida id Egipto. Siya di nan labi ay ipatpateg nan Israelita ay mangnemnemanda isnan inikkan nan apo ya siya na gedan nan labi ay masapol ay mentoka nan Israelita.

Nan Naibilin Ay Maikkan Isnan Fiestan Di Linmaosan Di Anghel 12:43-51

⁴³ Dat kanan nan apo ken da Moses ken Aaron en, “Siya dana nan maikkan isnan Fiestan di Linmaosan di Anghel. Maid makikkikan is baken Israelita isnan makan isnan naay ay fiesta.

⁴⁴ Ngem no waday baa is linakowanyo et mabalin ay makikan no nasegyatan.

⁴⁵ Adi mabalin ay makikan nan sangaili wenno nan makibalbalasa.

⁴⁶ Masapol ay adi kaibalbala isnan baey ya adiyo gopgopongen nan tolang nan dinawkisyo. Masapol ay makan na isnan baey ay naisaganaana.

⁴⁷ Masapol ay makilagsak am-in nan Israelita isnan naay ay fiesta.

⁴⁸ Ngem adi makikikan nan egay kasegyatan. No waday baken Israelita is nakiili ken dakayo ya kaytena ay makilagsak isnan naay ay fiestayo ay mangdayawanyo isnan apo et masapol ay segyatanyo omon-ona nan am-in ay lalaki isnan pamilyana. Daet maitapi et siya et menbalin ay Israelita ya mabalin et ay makilagsak isnan fiestayo.

⁴⁹ Nan naay linteg et siya nan tongpalen nan Israelita ya olay nan sangaili ay naitapi ken dakayo.

⁵⁰ Et pinatin ya inikkan am-in nan Israelita nan inbagan da Moses ken Aaron ay inbilin nan apo ken daida.

⁵¹ Nan deey ay agew et siya nan nangikaanan nan apo isnan Israelita id Egipto.”