Exodo 11 - Kalin Apo Dios

Inpagtek Moses Nan Mapateyan Nan Iyon-a Ay An-ak Di iyEgipto 11:1-10

¹ Dat kanan nan apo ken Moses en, “Esang pay ay dosa nan ikkak isnan alin di Egipto ya nan ipogawna. No malpas na et awnit palobosana dakayo ay komaan. Kinatet-ewana et awnit palayawena dakayo am-in.

² Id wani, kakalim nan Israelita ta ibagam en menkedawda isnan sagsagogongda ay iyEgipto is palata ya balitok ay al-alkos di awak.”

³ Et inpapangaton nan apo nan Israelita isnan nemnem di iyEgipto isonga inidyan nan iyEgipto nan dinawatda. Kinatet-ewana et inbilang nan oopisyalis ya ipogaw di Egipto si Moses ay napateg.

⁴ Ngem esapay komaan si Moses isnan sagang san ali et kinwanina ken siya en, “Siya na nan kanan nan apo, ‘Is tengan di labi et solsolek nan ili ay Egipto.

⁵ Et awnit matey am-in ay iyon-a ay lalaki ay an-ak di iyEgipto menlogi isnan iyon-a ay anak nan ali ay mangtawid koma isnan kinaalin amana et enggana isnan iyon-a ay anak di aped baa ay babai ay palabaybayo. Awnit matey gedan am-in nan damo ay anak di talakenda.

⁶ Et awnit madnge isnan ili ay Egipto nan napigsa ay agan di iyEgipto ay egay polos kadkadnge enggana id kasin ya awnit adi kasin madmadnge.

⁷ Ngem isnan Israelita et awnit maid olay aso is manggonggong ken daida wenno isnan talakenda. Et awnit siya nan manggetkanyo ay sak-en ay apo et initkenko nan Israelita isnan iyEgipto.’ Siya na nan kinwanin nan apo.”

⁸ Dat itoloy Moses ay mangwani isnan ali en, “Awnit omali nan oopisyalismo ay menpalintomeng ken sak-en ay menpakaasi ta ikaanko am-in nan naayday Israelita dakamit komaan.” Dat pilmi nan liget Moses ay nangtayan issan ali.

⁹ Ngem epdas kinwanin nan apo ken Moses en, “Awnit kayet adi idngen nan ali sik-a tasiyay maikkak nan ad-ado pay ay kaskasdaaw isnan ili ay Egipto.”

¹⁰ Isonga olay inikkan da Moses ken Aaron am-in nan naayda ay kaskasdaaw isnan sagang san ali et inpakedsen kayet nan apo nan nemnem san ali et egayna inpalobos ay komaan nan Israelita.