Exodo 10 - Kalin Apo Dios

Nan Binmalaan Di Adoado Ay Dodon 10:1-20

¹ Kasin kinwanin nan apo ken Moses en, “Omeyka isnan ali tay pinakedsek nan nemnemna ya nan iib-ana tapno ipailak ken daida nan naayday kaskasdaaw

² ya ta waday esayo sodsodoken is komasin isnan an-akyo ya ap-oyo no ngan nan inkakak ay nangpaligat isnan iyEgipto isnan nangipailaak ken daida isnan naayda ay kaskasdaaw. Et awnit siya nan manggetkanyo am-in ay ipogaw ay sak-en nan apo.”

³ Dat kasin omey da Moses ken Aaron isnan ali et kananda ken siya en, “Kanan nan apo ay Dios di Hebreo en ay tongona pay kano di menpakombabaam. Ipalobosmo et kano nan ipogawna ta omeyda mendayaw ken siya.

⁴ No kayet ikekedsem et ipaiyalina is wakgat nan adoado ay dodon isnan am-in ay ilin di Egipto.

⁵ Isnan kaadoadoda et ap-apanda am-in ay lota dadapay kanen am-in nan egay kinawas san dalalo ya olay nan nabay-an ay kaiw.

⁶ Awnit ponowenda nan baeymo ya nan am-in ay bab-aey nan iib-am ya nan ipogawmo et maid kankanegna is inil-ilan din alal-apoyo id sangadom.” Nakwas ay kinwanin Moses di dat komaan.

⁷ Dat kanan nan oopisyalis isnan ali en, “Ay tongona pay di somaldengan nan deey am-ama ay mangpaligaligat ken datako? Palobosam et od daida ay lalalaki ta omeyda mendayaw isnan apo ay Diosda. Ay adim ilan ay naay maengew nan ili tako?”

⁸ Gapo isnan kinwanida dat ipaayag san ali da Moses ken Aaron et kanana ken daida en, “Mabalin et ay omey kayo mendayaw isnan apo ay Diosyo ngem sinoda pay nan omey?”

⁹ Dat kanan Moses en, “Omey kami am-in. Ikawitmi nan an-akmi, nan kalnilo ya kaldingmi ya nan bakbakami tay masapol ay menlagsak kami ay mangdayaw isnan apo.”

¹⁰ Dat kanan san ali en, “Adiyak kitdi ipalobos ay ipakkeyyo nan bababai ya an-akyo. Mamagtek ay wada nan teken ay nemnemnemenyo.

¹¹ Dakayo et kedeng ay lalalaki nan omey ay mendayaw isnan apo mo siya di nan omeyyo dalon ikkan.” Nakwas ay kinwanin san ali na danat palayawen da Moses ken Aaron isnan kad-ana.

¹² Dat kanan nan apo ken Moses en, “Oyadem nan ledengmo isnan ili ay Egipto ta omey nan dodon ay mangkakan isnan am-in ay mola ay egay kinawas san dalalo.”

¹³ Dat isawad Moses san sokodna daet ipaey nan apo nan dagem ay nagapo isnan balaan di agew. Sin-agew ya sinlabiyan ay nindagem issan deey ay ili. Kawakgatana pay dat ikawit nan dagem nan adoado ay dodon et ipaeyna isnan dagan nan Egipto

¹⁴ et maiwakatda isnan am-in ay ilin di Egipto et ompada isnan am-in ay lota ya solsolin nan ili. Kedeng na is kaad-adon di dodon is naila et awnit maid et kegtona is kaad-adon di dodon is kasin mail-ila.

¹⁵ Inap-apanda nan lota et enggana ay adiyet maila dadapay kanen am-in ay mola ya begas di kaiw ay egay kinawas san dalalo. Maid polos tobon di mola wenno kaiw is nabay-an isnan am-in ay ilin di Egipto.

¹⁶ Dat ikakamon san ali ay mangipaayag ken da Moses ken Aaron et kanana ken daida en, “Nakabasolak isnan apo ay Diosyo ya ken dakayo.

¹⁷ Et id wani pakawanenyo nan basolko dakayot ilowalo isnan apo ay Diosyo ta kaanena nan naay makapatey ay dosa.”

¹⁸ Dat taynan Moses san ali et omey menlowalo isnan apo.

¹⁹ Dat ipadagem nan apo nan napigpigsa ay dagem ay nagapo isnan maon-onogan di agew et ipallosna san deeyday dodon isnan baybay ay makwani en Gadangdang. Maid polos nabay-an is dodon isnan ilin nan Egipto.

²⁰ Ngem dat pinakedsen kasin nan apo nan nemnem san ali et egayna pinalobosan san Israelita.

Nan Binmolingetana 10:21-29

²¹ Dat kasin kanan nan apo ken Moses en, “Idokyawmo nan ledengmo id daya ta bomolinget am-in nan ili ay Egipto ta menkapkapokap nan ipogaw.”

²² Dat idokyaw Moses nan ledengna ay id daya et bomolinget ay pilmi nan ili ay Egipto is tolo ay agew.

²³ Et egay nin-asiil-ila nan iyEgipto ya egayda binmalbala isnan bab-aeyda issan tolo ay agew ay binmolingetana ngem isnan tean nan Israelita et menpat-a.

²⁴ Dat kasin ipaayag san ali da Moses et kanana en, “Mabalin et ay omey kayo mendayaw isnan apo. Ikawityo nan bababai ya nan oongong-a ngem taynanyo nan kalnilo, kalding ya bakbakayo.”

²⁵ Dat kanan Moses en, “Adi pay sik-a ngalod nan mang-iyali isnan talaken ay poowanmi ay igasingmi isnan apo ay Diosmi?

²⁶ Isonga masapol ay ikawitmi nan talakenmi et maid polos olay esa is mabay-an tay masapol ay piliyenmi isnan talakenmi nan osalenmi ay mangdayaw isnan apo ay Diosmi. Adimi pay laeng getken no ngan nan osalenmi ay idaton isnan mangdayawanmi isnan apo enggana ay sokod kami omdan id isdi.”

²⁷ Dat kasin pinakedsen nan apo nan nemnem san ali et egayna inpalobos nan Israelita.

²⁸ Dat kanan san ali ken Moses en, “Komaanka isnan naay ay kad-ak. Adika kasin menpapaila ken sak-en tay no kasinka menpaila et ipapateyko sik-a.”

²⁹ Dat kanan Moses en, “Ala wen, adiyak et kasin menpapaila ken sik-a.”