Deuteronomio 8 - Kalin Apo Dios

Masapol Ay Adi Makalkalingkingan Nan apo 8:1-20 ; 10:17-22 11:8-15 , 18-21 26-28

¹ Dat itoloy Moses ay mangwani en, “Tongpalenyo ay ostoosto nan am-in ay bilinko ken dakayo id wani tapno matago kayo, omad-ado kayo ya mentee kayo isnan daga ay inkalin nan apo isdin alal-apoyo id kasikasin.

² Nenemnemenyo nan inikkan nan apo ay nang-ipangpango ken dakayo isnan ninbab-aatanyo isnan pondag isnan epatpoo ay tew-en. Pinasingpetna dakayo isnan nangpaligatana ay nangpadas ken dakayo ta mangtekana isnan wada isnan nemnemyo no met laeng tongpalenyo nan bilbilina.

³ Inpalobosna ay maoowat kayo danat pakanen dakayo is mana ay egayyo tinamtamtaman ya olay din alal-apoyo et egayda getken nan tamtamna. Siya di nan inikkana ta isolona ken dakayo ay baken makan et kedeng di katagowan di ipogaw nodi masapol ay patiyenda am-in ay kankanan nan apo.

⁴ Et isnan epatpoo ay tew-en ay ninbab-aatanyo et egay kadondonot nan badbadoyo ya egay binombomgeng nan siksikiyo.

⁵ Nenemnemenyo ay solsolowan ya dosaen gedan nan apo ay Diosyo dakayo ay kaneg nan ikkan nan ama ay mangsolsolo isnan anakna.

⁶ Isonga ikkanyo ya tongpalenyo nan bilin nan apo ken dakayo dayopay patpatgen siya.

⁷ Tay nan apo ay Diosyo et iyeyna dakayo isnan maloweb ay daga ay wada nan kaginaginawang ya menbala ay danom isnan tantanap ya isnan bilbilig.

⁸ Ya wada nan esek ay kaneg nan pagey, nan kaiw ay olibo, tap-in di kak-aiw ay mabgas, ya wada nan dilo.

⁹ Id isdi et adi kayo maow-owat tay wada nan am-in ay masapolyo. Olay pay nan bilbiligna et wada nan landok ya gambang.

¹⁰ Wada am-in ay masapolyo isdi isonga mendayaw kayo isnan apo ay Diosyo isnan gawigawis ay daga ay inidyana ken dakayo.

¹¹ Makailanyo ta adiyo kalkalingkingan nan apo ay Diosyo. Tongpalenyo am-in nan lintegna ay ibagak ken dakayo id wani.

¹² Isonga no wada et am-in nan kaytenyo ay kanen ya nakasaad kayo et is baeyyo ay menteanyo

¹³ ya no inmado et nan talakenyo ya binmaknang kayo dakayopay kinmadangyan

¹⁴ et makailanyo ta adi kayo lomastog ya adiyo kalkalingkingan nan apo ay Diosyo ay nang-ikaan ken dakayo id Egipto ay nabab-aaanyo.

¹⁵ Inpangpangona dakayo isnan annaannawa ya kaeegyat ay pondag ay kad-an di ado ay menkedet ay oweg ya gayaman dapay maid polos danom. Et isdi pinabalana nan danom isnan bato ta waday inomenyo.

¹⁶ Isdi gedan et inagtana dakayo is mana ay kanenyo ay makan ay egay polos tinamtamtaman din alal-apoyo id kasikasin. Inikkana dana ta mangpadasana ken dakayo tapno isnan odidina et pagawisena nan biyagyo.

¹⁷ Isonga adiyo koma kankanan en binmaknang kayo gapo isnan kabaelanyo ya pigsayo.

¹⁸ Nenemnemenyo na. Nan apo ay Diosyo nan mang-idya ken dakayo isnan kabaelanyo tapno bomaknang kayo. Ik-ikkana na gapo tay enggana id wani et oowenana nan tolagna ay din nakitolagana isdin alal-apoyo.

¹⁹ Adiyo kalkalingkingan nan apo ay Diosyo. Adi kayo mendaydayaw ya mensilsilbi isnan sinangdidios tay no ikkanyo dana et ibabagak ay awnit madosa kayo engganay maamin kayo.

²⁰ Kanak kasin en, no adiyo patiyen nan apo et awnitna dosaen dakayo ay kaneg nan awnitna mangdosaan isnan kaipoipogaw isnan awnityo datngan.”