Deuteronomio 6 - Kalin Apo Dios

Nan Napateg Ay Bilin 6:1-9

¹ “Siya dana am-in nan linteg ay inbilin nan apo ay Diosyo en ibagbagak ken dakayo. Tongpalenyo dana isnan daga ay ngannganiyo menkowa.

² Isnan matatagowanyo et masapol ay dakayo ya nan an-ak ya ap-oyo et patgenyo nan apo ay Diosyo ta mangtongpalanyo isnan am-in ay lintegna ay inbagbagak ken dakayo tasiyay mabaybayag nan matatagowanyo isnan deey ay daga.

³ Isonga dakayo ay Israelita et idngeyo nan naayda ay linteg tapno gawis nan biyagyo ya omadoado kayo isnan menteanyo isnan deey ay gawigawis ya maloweb ay daga ay inkalin nan apo ay Dios din alal-apoyo.

⁴ Nenemnemenyo na dakayo ay Israelita. Nan apo et siya et kedeng nan Dios tako ay maid teken.

⁵ Masapol ay laylaydenyo ay ostoosto nan apo ay Diosyo isnan nemnemyo ya kabaelanyo ya isnan am-in ay ik-ikkanyo.

⁶ Adiyo kalkalingkingan nan naayda ay bilin ay ibagbagak ken dakayo id wani.

⁷ Itoltoloyyo ay mang-ibagbaga is dana isnan an-akyo ya nemnemnemenyo gedan no wada kayo isnan baeyyo wenno isnan ad-addawi, no men-iilleng kayo wenno men-ob-obla kayo

⁸ ya ibedbedyo isnan takkayyo ya isnan kitongyo nan naisolatan di bilin ta mang-ipanemnemnem ken dakayo.

⁹ Isolatyo gedan isnan mensinombangilen di segpanyo ya isnan deeyday lowangan nan ili.”

Nan Nang-ibagaan Moses Isnan Ommat No Adida Tongpalen Nan apo 6:10-25

¹⁰ Dat itoloy Moses ay mangwani en, “Inkalin nan apo ay Diosyo isdin alal-apoyo ay da Abraham, Isaac ya ken Jacob en ipaeyna dakayo isnan daga ay wada et nan dadadadakke ya nanam-ay ay il-ilina ay sinaad di teken ay ipogaw

¹¹ ya bab-aey ay nanapno is ganaganagwis ay baken kayo is nang-ipondo. Wada pay nan bobon ay baken kayo is nangkaot ya om-a ay naeeskan et. Et no iyey nan apo dakayo isdi ya wada am-in nan kaytenyo ay kanen

¹² et makailanyo ta adiyo kalkalingkingan nan apo ay nang-isalakan ken dakayo id Egipto ay nabab-aaanyo.

¹³ Patgenyo nan apo ay Diosyo ta siya et kedeng nan daydayawenyo ya kedeng nan ngadana is osalenyo no mensapata kayo.

¹⁴ Adi kayo mendaydayaw is kompolni ay sinangdidios di ipogaw isnan sagsag-enyo.

¹⁵ Tay no mendayaw kayo isnan sinangdidios et dadama nan liget nan apo ken dakayo et nan ikkana ay mendosa et kaneg nan ikkan di apoy ay engganay mamaid kayo isnan batawa. Tay nan apo ay Diosyo et adyana ay waday maiyis-iso ken siya.

¹⁶ Adiyo padpadasen nan apo ay Diosyo ay kaneg din nangpadasanyo ken siya id Massa.

¹⁷ Makailanyo ta tongpalenyo am-in ay linteg ay inbagana ken dakayo.

¹⁸ Masapol ay ikkanyo nan osto ya nan gawis isnan pang-iilaan nan apo tapno gawis nan biyagyo ya ta awnityo tawiden nan maloweb ay daga ay inkalin nan apo isdin alal-apoyo id kasin

¹⁹ isnan awnityo mang-abakan isnan mangbosboso ken dakayo ay kaneg din inkalina.

²⁰ Is kasin no sooten nan an-akyo en, ‘Ay ngan nan kayat ay kanan nan linteg ya bilbilin ay inbagan nan apo ay Dios tako en tongpalen tako.’

²¹ Dakayot kanan en, ‘Id kasin et baa kami isnan alin di Egipto ngem insalakan nan apo dakami isnan pilmi ay kabaelana.

²² Et dalonmi inila nan kaskasdaaw ya kaeegyat ay inikkana isnan alin di iyEgipto ya isnan am-in ay wada isdi.

²³ Insalakana dakami id Egipto danat iyali dakami isnan naay daga ay inkalina ay idyana isdin alal-apo tako id kasikasin.

²⁴ Inbilin nan apo ay Dios tako en tongpalen tako am-in ay bilina ya patgen tako siya tapno gawis nan biyag tako datako pay matagotago ay kaneg nan ikakan tako id wani ay timpo.

²⁵ Et no tet-ewa ay tongpalen tako nan naayda ay bilin nan apo et gawis nan pangiil-ana ken datako.’ ”