Deuteronomio 5 - Kalin Apo Dios

Nan Simpoo Ay Bilin 5:1-21

¹ Dat dinagop Moses nan Israelita et kinwanina ken daida en, “Dakayo ay Israelita, dengngenyo nan linteg ay ibagbagak ken dakayo id wani. Adalenyo ay gawis daida dakayot makailan ta tet-ewa ay tongpalenyo.

² Isdin kawad-an tako isnan bilig ay Sinai et nakitolag nan apo ay Dios tako isnan Israelita

³ ay baken kedeng din alal-apo tako is nakitolagana nodi ken datako am-in ay natatago ay wada isna ya nan daan maiyanak.

⁴ Et id isdi et nakikali nan apo ken dakayo isnan menbidbidang ay apoy.

⁵ Intaktakdegak pay gedan dakayo isnan apo ay mang-ipagpagtek isnan ibagbagana tay omegyat kayo isdin menbidbidang ay apoy et egay kayo tinmikid isnan bilig. Kinwanina en,

⁶ Sak-en nan apo ay Diosyo ay nang-ikaan ken dakayo id Egipto ay nabab-aaanyo.

⁷ Adi kayo mendaydayaw is teken ay Dios nodi sak-en et kedeng.

⁸ Adi kayo somapsapo is tinagtago wenno kompolni ay kankaneg nan wada isnan daya, nan batawa wenno nan wada isnan danom.

⁹ Adi kayo mendaydayaw wenno mensilsilbi isnan kompolni ay aped sinapsapon di ipogaw tay sak-en nan apo ay Diosyo et adyak ay waday maiyis-iso ken sak-en. Et dosaek nan mang-adi ken sak-en ya nan an-akda enggana isnan maikatlo ya maikap-at ay ap-oda.

¹⁰ Ngem ipailak nan layadko isnan manglayad ken sak-en ya mangtongpal isnan bilinko et enggana isnan kalibolibo ay aap-oda is kasin.

¹¹ Adiyo os-osalen nan ngadanko isnan ngawi ay banag tay sak-en ay apo ay Diosyo et dosaek nan olay sino ay aped mang-os-osal isnan ngadanko isnan ngawi.

¹² Adiyo kalkalingkingan ay mangtongpal isnan bilin nan apo ay Diosyo maipanggep nan agew ay omillengan.

¹³ Tay nan enem ay agew et omanay is mang-ikkananyo isnan oblayo.

¹⁴ Ngem men-illeng kayo isnan maikapito ay agew tay siya nan agew ay pala ken sak-en ay apo ay Diosyo. Isnan deey ay agew et adi kayo polos men-obla ay olay nan an-akyo, nan baayo, nan talakenyo wenno nan sangaili ay wada isnan teanyo tay masapol ay men-illeng gedan nan baayo ay kaneg ken dakayo.

¹⁵ Adiyo kalkalingkingan ay baa kayo id Egipto et sak-en ay apo ay Diosyo nan nang-isalakan ken dakayo isnan panakabalinko. Isonga sak-en ay apo ay Diosyo et ibilinko ken dakayo ay adi kayo men-obla isnan agew di illeng.

¹⁶ Tongpalenyo da amayo ken inayo tay siya nan bilin nan apo ay Diosyo tapno gawis nan biyagyo ya tapno mabaybayag nan matatagowanyo isnan daga ay idyak ken dakayo.

¹⁷ Adi kayo menpatpatey.

¹⁸ Adi kayo makikamkamolala.

¹⁹ Adi kayo men-ak-akew.

²⁰ Adi kayo menpabpabasol isnan ib-ayo.

²¹ Adiyo ap-apalan nan asawan nan ib-ayo, nan baeyna, nan payewna, nan baana, nan bakana, nan kabayona wenno kompolni ay kokwana.”